Эшеңне яратып башкарсаң гына, уңышка ирешәсең

Зөләйха Абдуллина Арча районының Носы авылында туып-үскән. Ул кечкенәдән сыер савучы булып эшләгән әнисе Сәрия Якуп кызы янына эшкә йөри. Ул чакта ук ул хайваннар турында кайгыртырга яраткан.
- Җәйге каникулларда мин сыер савучыларны алмаштыра башладым, - дип сөйли Зөләйха Зәки кызы. - Җиденче сыйныфта укыганда, егерме биш сыердан торган группа җыйдым һәм өлкәнрәк хезмәттәшләрем белән беррәттән эшләдем. Дөрес, алар миңа эштә ярдәм итте, киңәшләрен бирделәр. Шулай тәҗрибә тупладым. Әлбәттә, бу эш җиңелләрдән түгел, шулай да аны һәрвакыт яратып башкардым.
Мәктәпне тәмамлаганнан соң язмышым кискен үзгәрде, сыерларымны һәм яраткан эшемне калдырырга туры килде. Дусларым белән бергә мин Казанга килдем, анда ун ел буе төзелештә штукатур-маляр булып эшләдем.
Апам шалтыратып: “Кабат сыер савучы булып эшләргә теләмисеңме”, дип сорады. Ул, Шихаздада янә савым фермасы ачулары һәм “Татарский” совхозына сыер савучы кирәклеген хәбәр итте. Мин бик теләп ризалаштым, 1992 елда шунда урнаштым. Егерме биш тана алып кайттылар. Әлбәттә, яраткан эшемне сагындым һәм бик теләп эшли башладым. Шартлар әйбәт иде, намус белән эшләргә һәм яхшы нәтиҗәләргә генә ирешергә кирәк иде.
Зөләйха Зәки кызы күп еллар дәвамында лидерлыкны бирми, берничә тапкыр районда беренче урыннарны яулый. "Машина белән сыер саву осталары” бәйгесендә генә дә дүрт ел рәттән җиңү яулый, икешәр тапкыр икенче һәм өченче урыннарны ала. Республика бәйгеләрендә дә күп тапкыр катнаша, анда берничә тапкыр иң яхшы унлыкка керә. Бөтен Татарстанны йөреп чыга, башка районнардагы коллегалары белән тәҗрибә уртаклаша.
Хәзер ул шунда  ук эшли, әмма хәзер ферма “Татарский” бүлекчәсе Муллагалиев А.Р. КФХ дип атала. Зөләйха Абдуллина бер үк вакытта сыер савучы да, бозау караучы да.
- Безнең Зөләйха Зәкиевна - үрнәк хезмәткәр һәм яхшы  кеше, - диде ферма мөдире Анна Вәлиева. - Ул иң беренче булып эшкә килә һәм иң соңгысы булып китә. Үз эшен ярата, намус белән башкара, шуңа күрә һәрвакыт яхшы күрсәткечләргә ирешә. Аның эш урынында һәрвакыт чисталык һәм тәртип, ә сыерлар, бозаулар тук һәм көр.