Надеждинода 100 урынга исәпләнгән клуб төзелә

Хәзерге вакытта буяу, штукатурлау кебек эчке эшләрне тәмамлыйсы калган. Бер үк вакытта урамда коймалар куела.
Соңрак газон, агачлар утыртачаклар.

- Без бик шат.  Хәзер авылыбыз бөтенләй башка. Бездә еш кына җыелышлар, иҗади чаралар була. Заманча уңайлы бинада авылдашлар белән очрашу тагын да күңеллерәк булачак, - дип уртаклашты безнең белән Любовь Коробова. Күп функцияле үзәктә авыл мәдәният йорты, китапханә, ФАП һәм авыл советы урнашачак.

- Безгә яңа клуб бик кирәк иде. Халык бу хакта күптән сорый, бигрәк тә яшьләр. Ә безнең эш туктап тормый. Әлегә без арендага алынган бинада эшлибез, - дип сөйли мәдәният йорты директоры Татьяна Гаврилова. Авыл клубының  горурлыгы – «Надежда» рус вокаль ансамбле. Ул 2014 елда оешкан. Күптән түгел халык ансамбле исемен алган.

Балалар һәм өлкәннәр өчен 7 клуб оешмасы эшли. Алар бию, вокал, рәсем ясау, декоратив-гамәли сәнгать белән шөгыльләнәләр. Өстәл теннисы түгәрәгенә йөриләр. Яшьләр өчен дискотекалар үткәрелә. Бәйрәм чаралары, концертлар еш оештырыла.