Павел Корчагин: «Сугыш башланган, дигән сүзләр әле дә колакта яңгырап тора»

Бүген Павел Семенович Кощак авылында яши. Җиңү көне алдыннан без аның янында кунакта булдык.

Безнең химия укытучысы, бик акыллы кеше иде, ул Беренче бөтендөнья сугышында катнашкан, - дип сөйли ветеран, - бер тапкыр дәрес вакытында: «Егетләр, сезгә фронтка китәргә туры килүе бар, сугыш озакка сузыла...», - дип әйткән иде.

Шулай була да. Павел Семенович сугышка бармаган да булыр иде, аңа унсигез яшь тә тулмаган була, ул гаиләдә иң өлкәне, оборона заводында эшли алыр иде... Әмма әтисенең Ржев янында сугышта һәлак булуын белгәч, егет корал белән Ватанын сакларга карар итә. 1943 елның гыйнварында аны мобилизациялиләр. Өйрәтү артиллерия полкына билгелиләр.

1944 елның июнендә ул «Багратион» кодлы операциясендә катнаша, ул чакта ике ай эчендә бөтен Белоруссия азат ителә. Павел Семенович, торак пунктларны азат итеп, Кенигсберг юнәлешендә хәрәкәт иткәндә, аларга белорус картының очравын искә ала.

Ул безгә барысының да китүе, үзе генә калуы турында әйтте, - дип искә ала Павел Семенович. - Сүз уңаеннан, ул иске рус армиясендә хезмәт иткән. Безне, коедан су эчмәгез, дип кисәтте, ә без эчмәдек, командирларыбыз кисәтеп куйган иде.

Бөек Ватан сугышы ветераны, «Куркыныч булдымы», дигән сорауга:

Аны сүз белән генә әйтеп булмый. Бүген син бар, ә иртәгә син юк, - дип җавап бирде.

Ә тоткын немецларга карата нинди мөнәсәбәттә булуларын сорагач, Павел Семенович түбәндәгеләрне билгеләп үтте:

Мин аларга карата кызгану хисләре кичердем, алар безнең Ватан территориясенә юкка бәреп кергән. Ничек кенә авыр булмасын, барыбер җиңү безнең якта булачагына мин һәрвакыт ышандым. Җиңәчәгебезне һәрвакыт белдем!

Ул хәзер дә шулай уйлый. Телевизор карый, барлык яңалыкларны күзәтеп тора һәм җиңүгә ышана. 97 яшьлек ветеран ялгызы гына яши, әмма ул моңсуланмый. Аның күңеленә якын яраткан шөгыле бар - ул аккордеонда уйный. Хәтта безнең өчен «В парке Чаир распускаются розы» һәм «Я встретил Вас и все былое» дигән җырларның көйләрен дә башкарды. Аның сүзләренчә, ул үзенең аккордеоны белән горурлана, аның клавиатурасы пианинога охшаш. Павел Семенович бу музыка коралында уйнарга сугыштан соң өйрәнә, дәресләр ала…

Ул сугышларның берсендә яралана һәм 1944 елда комиссияләнә. Сугышчан хезмәте өчен Павел Корчагин «Батырлык өчен» медале, «Бөек Ватан сугышы» ордены һәм юбилей медальләре белән бүләкләнгән.

Питрәчкә бармыйм инде, - ди ул, - әмма үзебездә, Кощакта, Җиңү көнендә бәйрәм митингына, һичшиксез, барачакмын.