Питрәч янгын күзәтчелеге хезмәткәрләре һөнәри бәйрәмнәрен билгеләп үтәләр

Район территориясендә Питрәч, Шәле, Ленино-Кокушкино һәм Царевода янгын коткару частеның дүрт бүлекчәсе эшли. Питрәч часте карамагында өч машина, шәхси составта 49 кеше. Башка өч бүлекчәдә 44 кеше эшли һәм алты берәмлек техника исәпләнә. “Лаишлес” (Кызыл-Яшьләр) һәм Пановкада янгын частьлары бар, аларда 12 кеше эшли. 34 ирекле янгын сүндерү формированиесе: тугыз янгын сүндерү командасы һәм 25 янгын сүндерү дружинасы бар, аларда 104 кеше хезмәт куя.

“ЭЛЕК СЫЙФАТСЫЗ ЭЛЕКТР ҮТКӘРГЕЧЛӘРЕ ҺӘМ ҖЫЛЫТУ КАЗАННАРЫ АРКАСЫНДА ЯНГЫННАР КҮП ИДЕ”

Владимир Федотов Питрәчтә туып-үскән. Электроника, радиоидарәле машиналар белән шөгыльләнергә яраткан, аларны әтисе белән бергәләп эшләгәннәр. Володяның тагын бер шөгыле – ул үз цехында агач эшләнмәләр ясарга ярата. Мәктәптә югары сыйныфта укыганда ук, ул инде заказ буенча ишекләр, тәрәзә рамнары һәм башка әйберләр ясый торган булган. Владимир бүгенге көндә дә буш вакытында бу эш белән шөгыльләнә.

Ул балачактан ук шофер булырга теләгән, шуңа күрә СПТУ-93кә укырга кергән. Машина йөртү таныклыгы алгач, шофер булып эшләргә уйлаган. Ләкин әтисе һәм абыйсы Валерий киңәше буенча эш урыны итеп янгын сүндерү бүлеген сайлаган, бу 1997 елның октябрендә була.

– Безнең хезмәт җаваплы, куркыныч булса да, янгын сүндерүче булуыма беркайчан да үкенмәдем, – дип билгеләп үтте Владимир Егорович. – Беренче көннәрдә үк берничә янгын сүндерергә туры килде. Элек сыйфатсыз электр үткәргечләре, җылыту казаннары аркасында янгыннар күп була иде. Хәзерге вакытта җиһазлар ышанычлырак, шуңа күрә кыска ялганышлар сирәк була. Коры үләнне еш яндыралар. Мелиораторов урамындагы сарайлар янганда бик авыр булды. Ул вакытта ут 50дән артык сарайны юк итте. Кышын янгынны сүндерү авыррак, киемгә су эләгә һәм ул ката. Барлык авырлыкларга карамастан, миңа эшем ошый, чөнки ул кешеләр өчен мөһим, кирәкле эш, – диде ул.

Владимир Федотов 15 ел абыйсы белән бер караулда эшләгән, шофер Илфат Галиәхмәтов белән бергә бер сменада инде күптәннән эшли. Янгын сүндерүчеләр арасында хәзер яшьләрнең күп булуы аны шатландыра.

Владимир Егорович 2000 елда питрәчле Елена Викторовнага өйләнә, ул үзәк район хастаханәсендә эшли. Аның белән ике бала тәрбияләп үстергәннәр, кызлары Марина Казанда юрист булып эшли, кечесе Андрей әтисе юлыннан бара, КАТКда укый.

ХЕЗМӘТТӘШЛӘРЕ ӨЧЕН ҺӘРВАКЫТ БОРЧЫЛА

Питрәч янгын коткару часте канцеляриясе мөдире Елена Дормидонтова районның матур авылларының берсе – Кибәчтә туып-үскән. Балачакта дуслары белән урманга йөргәннәр, җиләк, чикләвек һәм гөмбә җыйганнар, Мишәдә балык тотканнар. Шулай да аның бер мавыгуы үзенә күбрәк тарткан.

– Минем әти Василий Гурьевич “Совет” колхозында бригадир булып эшләде, – дип сөйләде Елена Васильевна. – Ул үз эшләрен өйгә алып кайта иде, наряд япты, цифрлар белән күп эшләде. Мин аңардан счетта санарга өйрәндем, элек шундый прибор бар иде, барлык бухгалтерларның беренче ярдәмчесе иде ул. Һәм мин бухгалтер булырга уйладым.

Мәктәптән соң Елена техникумда укый, белем ала һәм туган авылына кайта, җирле авыл советына баш бухгалтер булып урнаша. 1987 елда авылдашы, тракторчы Иван Константиновичка кияүгә чыга. Ике елдан соң яшь гаилә Питрәчкә күченә. 1993 елда декрет ялыннан соң Елена Васильевна Питрәч янгын сүндерү бүлегенә эшкә килә һәм шуннан бирле монда эшли. Беренче 20 елда баш бухгалтер, ә 2014 елдан канцелярия мөдире була.

Ул янгын сүндерү бүлегенең тере тарихы кебек, барысы да аның куллары аша уза, ул кадрлар бүлеге дә, материаль яктан җаваплы кеше дә. Аның эш көне идарә җибәргән документларны тикшерү белән башлана. Ул көне буе эш белән мәшгуль, буш вакыты юк диярлек. Барлык хезмәткәрләр белән дә бик яхшы мөнәсәбәттә. Елена Васильевна үз коллегалары өчен һәрвакыт борчыла, чөнки алар куркыныч хезмәт башкара.

Буш вакытларында ул бакчада эшләргә, пешерергә ярата. Аларның йорт хуҗалыгында тавыклар, үрдәкләр, казлар, дуңгызлар һәм үгезләр бар. Һәм, әлбәттә инде, өч оныгын тәрбияләүдә булыша.