Питрәч районында өлкәннәр өчен бәйрәм һәм спорт чаралары ункөнлеге узды

Наратлыкта узган “Игры долголетия” чарасының программасы бай эчтәлекле булды: Скандинавия йөреше, шашка, ГТО нормаларын тапшыру, күңелле эстафеталар һәм конкурслар. Болытлы һава торышына карамастан, 50дән артык кеше җыелды, һәркайсы төрле спорт ярышларында катнашты.

Тренер Александр Каляшинны спорт белән шаккатырып булмый, шуңа күрә ул бүген үзе өчен гадәти булмаган ярыш сайлаган: күзләрне йомып чүлмәктәге ярмаларны аера.

– Бу биремне мин үтәдем. Монда иң мөһиме бу түгел, ә саф һава һәм яхшы кәеф, – дип саный ул.

Габделхәй Гобәев бәйрәмгә култык таягы белән килгән. Операциядән соң әлегә шулай гына хәрәкәт итә ала, ләкин бу да аны туктатмаган. Ул шашка буенча район турнирларында даими катнаша.

– Без хатыным белән шундый чараларга һәрвакыт йөрибез. “Кайгырту”дан шалтыратканнарын көтеп кенә торабыз, – ди ул.

Иң күп катнашучыларны төньяк йөреше буенча ярышлар җыйды.

Безнең районда үз тормышларын йорт, кибет һәм поликлиника белән генә чикләргә теләмәгән пенсионерлар өчен бөтен шартлар да тудырылган. “Кайгырту” үзәгеннән тәкъдим ителгән активлык төрлелегеннән күпләр нәкъ менә төньяк йөрешен өстен күрә. Бүген инде әбиләребезнең, махсус таякларга таянып, авыл урамнары, парклар һәм стадионнар буйлап йөрүләрен күрергә күнеккәнбез. Берничә ел элек бу шактый сәер күренеш иде.

– Мин үзебезнең өлкәннәрнең тормышын төрлеләндерү, аларны сәламәт яшәү рәвешенә ничек тартырга икән, дип уйландым һәм үземнең игътибарымны скандинавия йөрешенә юнәлттем. Бу теманы өйрәнә башладым һәм нәкъ менә шул вакытта миңа: “Ә сезгә төньяк йөреше буенча тренер кирәкмиме?” дип шалтыраттылар, – дип сөйләде “Кайгырту” үзәге директоры Эльвира Хәйруллина.

Шулай итеп, әле картаерга теләмәгән Питрәч әбиләре тренер Ольга Жучкова белән таныша. Ул әлеге спорт төре буенча Россия җыелма командасы әгъзасы.

– Өлкән яшьтәге кешеләр скандинавия йөрешенә барыннан да элек интуитив рәвештә тартыла, чөнки бу уңайлы. Алар егылудан, үзләренә зыян китерүдән куркалар, ә монда ахыр чиктә таянырга кулда таяк бар. Соңрак алар инде ничек дөрес хәрәкәт итәргә, нинди таяклар сайларга, аларны ничек тотарга дип сорый башлыйлар. Таяксыз гына җәяү йөргән вакытта умырткалыкка, аркага һәм җилкәләргә йөкләнеш арта, ә төньяк йөреше вакытында алай түгел, бу тренировканы файдалырак итәргә мөмкинлек бирә, – дип сөйләде бу өлкәне яхшы белгән тренер.

Башта барысы да кулларынаякларын яздылар, шуннан соң гына юлга кузгалдылар. Бу спорт төрендә җиңелүчеләр була алмый, финишка килгән һәркемнең күңеле күтәренке иде.

Чара ахырында барысын да тәмле пылау һәм кайнар чәй белән сыйладылар.

Өлкәннәр ункөнлеге кысаларында пенсионерлар кайбер чәчтарашханәләрдә ташлама белән чәчләрен кистерә, бушлай кино карый һәм бассейнда йөзә ала иде. Анда шулай ук “Заплывы долголетия” ярышлары да узды. Ә район мәдәният йортында бәйрәм концерты булды. Тамашачылар өчен моңлы җырлар яңгырады, яшь биючеләр аларны хореографик номерлары белән сөендерде. Өлкән буын вәкилләрен район башкарма комитеты җитәкчесе вазифаларын башкаручы Илназ Дәүләтханов котлады. Ул аларга зирәклекләре, яхшылыклары һәм сабырлыклары өчен рәхмәт белдерде.

– Сез үзегезне туган районыгыз хакына фидакарь хезмәт итүгә багышладыгыз. Әхлакый кыйммәтләрне һәм традицияләрне саклаучылар, балалар һәм оныклар өчен һәрчак терәк һәм тугры ярдәмчеләр. Без сезнең алда мәңге бурычлы һәм сезне беркайчан да көндәлек кайгыртуыбыздан игътибарсыз калдырмаячакбыз, – дип билгеләп үтте ул.

Барлык авыл җирлекләрендә дә өлкәннәр өчен шундый концертлар һәм котлаулар әзерләнде. Районнан читтәге интернат-йортларда яшәүче питрәчлеләр дә игътибарсыз калмады, аларны бүләкләр белән билгеләп үттеләр.