Питрәч укытучысына мактаулы исем бирелде

Фото: © Илшат Гайсаров / «Питрәч-информ»

Мәгариф өлкәсендәге казанышлары һәм күпьеллык намуслы хезмәте өчен Питрәч беренче мәктәбенең рус теле һәм әдәбияты укытучысы Татьяна Фурсовага “Татарстан Республикасының атказанган укытучысы” дигән мактаулы исем бирелде.

Кырыс, шул ук вакытта ягымлы, искитеч сөйкемле, янында дәфтәрләр өеме – әлбәттә, күпләр бу тасвирламада укытучысын таныды. Алар барысы да төрле, әмма аларның максатлары уртак – укучыларга белем бирү, тәрбияләү, аларның потенциалын ачу.

Татьяна Николаевна укучыларны укытып кына калмый, аларны тәрбияли, олы тормышка әзерли. Аны чыннан да гаҗәеп педагог дип атарга була. Ул рус телен һәм әдәбиятын камил белә, үз белемнәрен укучыларга тапшыра, үз предметына кызыксыну уята, әсәрләрдә иң мөһимен күрергә, проблемалар турында фикер йөртергә, геройларга теләктәшлек күрсәтергә, укылганның мәгънәсе турында уйланырга, матур һәм дөрес итеп язарга, сөйләргә өйрәтә. Аның дәресләрендә балалар әхлакый, эмоциональ, иҗади яктан үсә. Татьяна Николаевна ярдәмендә укучыларның күбесе китап укырга ярата башлый.

Фото: © Илшат Гайсаров / «Питрәч-информ»

“Иң гадел укытучы”, – диләр аның турында балалар. Һәм бу дөрес фикер. Ул укучыларның белемнәрен объектив бәяли, аларга бик күп кызыклы һәм файдалы мәгълүмат бирә, үз шәкертләренең фикерләрен тыңлый. Татьяна Фурсова мөһим материалны укытуга бөтен җитдилеге һәм җаваплылыгы белән якын килә, ачык йөзле, бик сабыр кеше. Ул укучыларга яхшы үрнәк, үз эшенең чын остасы, хәтта иң катлаулы кагыйдәләрне дә җиңел истә калырлык итеп аңлата. Татьяна Николаевнаның укучылары аның предметы буенча ныклы белем алалар, дәүләт йомгаклау аттестациясендә үзләрен ышанычлы хис итәләр, анда югары баллар туплыйлар. Аның укучылары берничә тапкыр рус теле һәм әдәбияты буенча республика олимпиадаларында призлы урыннар яулаган.

Укытучы һөнәре авыр, ләкин асылы белән гаҗәеп тә, чөнки безнең киләчәгебез педагогостазларга бәйле. Күпләр бу һөнәрнең әһәмияте турында яздылар һәм язачаклар, әмма аның мөһимлеген сүз белән генә аңлатып булмый. Татьяна Николаевна – йөзләгән балага белем бирүгә зур өлеш керткән, аларның тормышына юнәлеш биргән педагог.