Питрәчле Батырлык ордены белән бүләкләнде

Александр Чернов хатыны Ирина һәм ике улы белән – Матвейга алты яшь, Павелга дүрт яшь.

Махсус хәрби операция зонасында хәрби бурычын үтәгәндә күрсәткән батырлыгы өчен Белкино авылыннан Александр Ч. Батырлык ордены белән бүләкләнде.

Александр мобилизациягә кадәр “Ак Барс-Питрәч” авыл хуҗалыгы предприятиесендә тракторчы булып эшләгән. Повестка китерерләр дип көтмәгән, ләкин үзен чакырулары мөмкин дип уйлаган. 2022 елның 3 ноябрендә ул хәрби хәрәкәтләр зонасына эләгә.

Башта якташыбыз пулеметчы була, аннары Ейск шәһәрендә өйрәнүләр уза, укчы-зенитчы була. Аның бурычы җир өсте киңлеген күзәтү, дошман авиациясенә якын килергә ирек бирмәү, аның очу аппаратларын бәреп төшерү.

2023 елның 24 октябрендә хәрби хезмәткәрне яралыйлар. Бу хәл ул сугыш кырыннан һәлак булган авылдашының гәүдәсен чыгарганда була.

– Безне яңа позициягә алып бардылар, шул позициядә минем иптәшемне үтерделәр, без бер авылдан, өч йорт аша гына яшибез, күршеләр, дустым, аның исеме Дима. Без аны алып чыкканда дошман күреп алып безгә ата башлады. Минем алда мина шартлады, һәм башым яраланды. Аңымны югалтканмын, күпмедер вакыттан соң аңыма килдем. Без дүрт кеше яраландык, беребез аягы нык җәрәхәтләнү аркасында бара алмады. Биш сәгать буе иптәшем белән икебез генә чыгып җиттек, үзебезнекеләр янына барып җиттек, анда кемнәр калганын әйттек. Алар артыннан инде икенче төркем барды һәм аларны эвакуацияләделәр, – дип искә ала Александр.

Ул Белгородта, аннары ике ай Смоленскида госпитальдә ята. Декабрьдән Александр өйдә, якыннары белән. Ул демобилизацияләнгән һәм "Д" хәрби категориясе алган, шуңа күрә сәламәтлеге торышы буенча армиядә хезмәт итә алмый. Алда аны озак вакыт тернәкләнү көтә. Бүләкләү тантанасы район үзәгендә ел саен уза торган Республика көненә багышланган “Питрәч таңнары” халык иҗаты бәйрәмендә узды. Орденны хәрби хезмәт ветераны Фәрит Вәлиев үз хуҗасына тапшырды.

– Батырлык ордены кебек бүләкне анда булган һәркем алырга тиеш. Һәркем үз гомерен куркыныч астына куя бит, – дип билгеләп үтте герой.

Александр гаиләсе белән килгән иде. Чарада аларга күргәзмәләр тәкъдим иттеләр, шулай ук ул уен алдыннан яшь футболчыларга туп бирде. Черновларны “Ватанны саклаучылар” дәүләт фондының безнең райондагы социаль координаторы Физәлия Никитина озата йөрде