Питрәчле Санкт-Петербургның хәрби югары уку йортына укырга кергән

Питрәчле Айнур Әхмәтҗанов Россиянең икенче башкаласында Михайлов хәрби артиллерия академиясе курсанты булды. Сентябрь башында ул присяга кабул итте.

МАХСУС ХӘРБИ ОПЕРАЦИЯ БАШЛАНГАЧ, ХӘРБИ БУЛЫРГА КАРАР КЫЛА

Малайлары тугач, һәр ата-ана аның чын яклаучы, саклаучы булып үсүен тели, әмма һәркем дә үз баласын хәтта бер елга армиягә хезмәт итәргә җибәрергә дә әзер түгел. Ә Әхмәтҗановларның улы Айнур мең ярым чакрымга биш елга укырга киткән һәм өенә елына ике генә тапкыр – кышкы һәм җәйге ялга гына кайтачак. Якыннары аның хыялын тормышка ашыру өчен мондый аерылышуга да ризалашканнар.

Айнур – ирле-хатынлы Лилия белән Илнурның бердәнбер баласы. Беренчедән тугызынчы сыйныфка кадәр ул Ленино-Кокушкино мәктәбендә укыган, анда ике яктан да әби-бабасы янәшәсендә була, ә унынчы һәм унберенче сыйныфларны Питрәч икенче мәктәбендә тәмамлаган. Ул яхшы укыган, спортта уңышларга ирешкән. 12 ел хоккей секциясендә шөгыльләнгән, "Пестрецы-2006" командасында һөҗүмче булып уйнаган. Өч иң яхшы уенчы кубогына лаек, призлы урыннар өчен бик күп медальләре бар. Әти-әнисе билгеләп үткәнчә, талантлы тренер Виктор Сорокин ярдәмендә аларның улы физик яктан бик яхшы әзерләнгән, бу аңа хәрби уку йортына укырга керергә ярдәм иткән, анда беренче урында көч һәм чыдамлык тора.

Әнисе – кошчылык фабрикасында сатып алулар буенча белгеч, әтисе – Казан авиация заводында мастер. Аларның берсе дә улларына үзләренең һөнәрен яки башка һөнәрне сайларга мәҗбүр итмәгән. Айнур, һич көтмәгәндә, югары сыйныфларда хәрби уку йортлары белән кызыксына башлый. Ул туганнан туган абыйсы, Казан югары артиллерия училищесын тәмамлаган, пенсиядәге офицер Динар Миңнуллин белән киңәшләшкән. Егет махсус хәрби операция барышын актив күзәтеп тора. Алгы сызыкта сыйныфташының әтисенең үлеме турында белгәч, бик нык борчыла, кайгыра. Әнисе белән, кемгә дә булса Ватанны сакларга кирәк бит инде, дип фикерләре белән уртаклаша башлый. Лилия Миндияровна башта улының сүзләреннән куркып кала, кул гына селти.

– Без аңа беркайчан да таләпчән булмадык. Ул ял көннәрендә төшкә кадәр тыныч йоклый ала иде, аңа артык өй эшләре кушмадык. Кайвакыт хәтта мин дә, укытучылар да, аңа бераз җитдилек җитми, дип саный идек. БДИ көнендә эштә утырам, соңга калмасын, бернәрсә дә онытмасын, дип борчылам. Шалтыратам, кайда икәнлеген сорыйм. Ә ул елмаеп, юлда Ленино-Кокушкинодан элеккеге сыйныфташларын очратканын һәм алар белән фотога төшүе турында әйтте. Ә аның менә-менә дәүләт имтиханы башланырга тора. Ул һәрвакытта да барысына да җиңел карый иде, – дип сөйләде әнисе.

Ләкин бу ваемсыз кыяфәт артында зур патриот һәм чын ир-ат яшеренгән, ул акрын гына, ләкин дөрес итеп үз максатына таба бара. Әле бер ел элек кенә ул әтисе белән Санкт-Петербургта шул ук академиядә ачык ишекләр көнендә булган. Укырга керү өчен физиканы тапшырырга кирәклеген белгәч, предметны ныклап өйрәнә башлый, репетитор белән шөгыльләнә. Уку йортына юллама алу өчен үзе военкоматка бара, медкомиссия үтә.

“УЛ БЕЗНЕҢ БЕРӘҮ ГЕНӘ”

Барысы да ул дигәнчә килеп чыга. Айнур БДИ баллары һәм физик әзерлек нормативлары буенча конкурстан үтә. Яшьтәшләре җәйге каникулларда ял иткәндә, ул инде июль башында Луга шәһәренә оча, анда яшь сугышчы курсларына йөри.

– Анда егетләр тулысынча армия атмосферасына чума. Автоматтан атарга өйрәнә, хәрби топография, устав өйрәнә, йөгерәләр, окоплар казыйлар, – дип санап китте Лилия Миндияровна.

Малайлар кырда кырыс шартларда иде, Айнурның организмы моңа әзер түгел иде, шуңа күрә биреште, аны пневмония белән хастаханәгә салдылар. Якыннарын сөендереп, ул тиз терелә. “Үзебезнекеләрне ташламыйбыз” дигән лозунг хәрби хезмәткәрләр, волонтерлар арасында гына түгел, курсантлар арасында да гамәлдә булып чыкты. Лугада питрәчлене үзеннән олырак Татарстан егете һәрьяклап хуплап, рухландырып тора. Бу аңа авырлыкларга түзәргә ярдәм итә.

Айнур үзе дә балачактан ук аралашучан, ярдәмчел. Аэропортка аны туганнары белән дуслары озаткан, ә иң яхшы дусты Вадим Сахаров хәтта присяга биргән чакта да килгән. Әти-әнисе улларын присяга биргәнче ике ай күрмәгән. Алар инде улларының үзгәрүен сизәләр. Ул тәрбияле малай, аның начар гадәтләре юк, начар компания белән йөрмәгән, ә хәзер ул тагы да үсеп киткән, чын ирегет булган, үз-үзенә карата таләпчәнлек арткан.

Сентябрьдән аның укуы башланды, ул гади беренче курс студентларының көндәлек тормышыннан сизелерлек аерыла. Казармада яши, һәр көне иртәдән кичкә кадәр минутлап язылган. Иртәнге алтыда торалар, һичшиксез физзарядка һәм йөгерү, телефонда кич белән генә утырып була, төгәлрәге, бу вакыт эчендә якыннары белән аралашырга гына өлгерәләр. Шул ук вакытта егетләрне кием-салым, канцелярия, торак һәм туклану белән тулысынча тәэмин итәләр, стипендия түлиләр. Безнең якташыбыз үзен яхшы яктан күрсәтергә өлгергән инде, чөнки аны отделение командиры, студентларча әйткәндә, староста итеп билгеләгәннәр. Шулай ук академиянең хоккей командасына кушылырга чакырганнар, әти-әниләре улларына хоккей экипировкасын җибәргәннәр инде.

– Без аның белән бик горурланабыз, – диде елмаеп Илнур Мансурович. – Мин үзем гомер буе хәрби формада булган кешеләргә сокландым, 45 яшемдә, балалар кебек, энемнең формасын киеп карадым. Улымның минем хыялымны тормышка ашыруына бик шатмын. Шунысы мөһим, минем теләгем буенча түгел, үз теләге белән. Тирә-юньдәгеләр безгә, мондый тыныч булмаган вакытта улыңны хәрби итү куркыныч түгелме, дигән сорау бирәләр. Махсус хәрби операция тиздән бетәр дип өметләнәбез. Айнур укудан соң ике белгечлек алачак, тыныч тормышта инженер булып урнаша ала. Без, әлбәттә, аның өчен борчылабыз, өстәвенә ул безнең бердәнбер балабыз. Ләкин һәр ата-ана үз баласына ярдәм итәргә тиеш, һәм без аның карарын хуплыйбыз. Аңа авыр булуын беләбез, әмма ул сынатмаска вәгъдә итә, һәм без аңа ышанабыз, – дип сүзен йомгаклады әтисе.

Ул улының медальләр таккан хәрби хәрәкәтләр ветераннары Мактау такталары яныннан битараф кына узып китә алмавын билгеләп үтте. Ул телевизордагы геройларга түгел, ә янәшәсендә яшәүчеләргә һәм эшләүчеләргә соклана. Бүген ул үзен районның горурлыгы дип санарга хаклы. Ул кыю адым ясаган, хәрби – үз гаиләсен генә түгел, бөтен илне саклаучы булырга теләгән.