Питрәч районында биналарның түбәләреннән кар төшү куркынычы барлыкка килде

Синоптиклар фаразлары буенча, районда гыйнвар азагына кадәр кар явачак.

Быел безне әкияти матур карлы кыш шатландырды. Без, соңгы елларда моңа җавап итеп, мондый һаваның тискәре яклары барлыгын оныттык. Тротуарлар һәм юллар кар көртләре белән капланды, юллардан үтеп йөрерлек түгел. Кар ява башлаганнан бирле махсус техника һәм тракторчылар бертуктаусыз эшли.

- Кар күп яуганнан соң, беренче чиратта, үзәк урамнар чистартылды. Мини-төягеч сафтан чыкты, шуңа күрә без тротуарларны чистартуга бу атна башында керештек. Дүшәмбе көнне мини-төягеч «Дуслык» паркын, Школьная, Перчков, Казанская урамнарында парковкаларны чистартты, - дип сөйләп узды җирлек башкарма комитеты җитәкчесе Павел Сиваев.

Социаль челтәрләр аша күп фатирлы йортлар янындагы тротуарларны һәм парковкаларны чистартуга кагылышлы күп кенә ризасызлыклар белдерәләр. Эш шунда, районда билгеләнгән торак-коммуналь хезмәтләр өчен тарифлар күп кар яуган көннәрдә җитәрлек күләмдә көч һәм акча җәлеп итәргә мөмкинлек бирми.  Идарәче компания тарифларны арттыруга карата халык белән җыелышлар үткәргән, әмма бу һәрвакыт кире кагылган.

- Без дә халыкка районныкыннан бераз аерылып торган тариф тәкъдим иттек. Түләү югарырак булачак, әмма шуның аркасында күбрәк техника һәм эшчеләрне җәлеп итү мөмкинлеге булачак,  -  дип аңлаттылар. Нәтиҗәдә, халык ризалашты, һәм без «Йорт яны территориясен төзекләндерү һәм карап тоту» өлешендә статьяны арттырдык», - дип сөйләде «Царево» торак-коммуналь хуҗалыгында идарәче компания җитәкчесе Айназ Гарифуллин. Нәтиҗә буларак, биредә кар чистартуга карата шикаятьләр юк диярлек.

Идарәче компания вәкилләре белән шушы көннәрдә  түбәләрдән һәм кәрнизләрдән кар, боз ишелеп төшүгә юл куймау буенча эшлекле киңәшмә узды. Моның өчен район башкарма комитеты җитәкчесе Альберт Хәбибуллин тиешле йөкләмәләр билгеләде.
Төгәлрәге, беренче чиратта, район территориясендә кар ишелеп төшү урыннарын тикшерү. Кар текә елга ярлары, чокыр, карьерлардан  ишелеп төшәргә мөмкин. Биналарны һәм корылмаларны тикшергәндә киң катламлы һәм яссы өслекле биналарга игътибар биреләчәк. Шулай ук мондый урыннарда уеннарга юл куймас өчен, балалар артыннан контрольне көчәйтәчәкләр. Үз-үзеңне тоту кагыйдәләре һәм куркынычсызлык чаралары турында мәгълүмат мәктәпкәчә яшьтәге балаларның ата-аналарына һәм мәктәп укучыларына ватсап төркемнәре аша җиткереләчәк. Идарәче компанияләр җитәкчеләре, милекчеләр һәм баланс тотучылар торак йортларның һәм административ биналарның түбәләрен кардан һәм боздан чистарта башладылар. «АКТАЧЫ-К» идарәче компаниясе бу эшне Комсомольская, 3, 3а һәм Титов, 27а урамнарында башкарган инде.

- Җомга көнне Казанская, 1а, 1б һәм 1в йортлары түбәләре автовышкалар кулланып чистартылачак, - дип билгеләп үтте идарәче компания җитәкчесе Нияз Бикчәнтәев. Алар барысы 9 йортка хезмәт күрсәтә.

Икенче «Уютный дом» идарәче компаниясе 57 күпфатирлы йортка хезмәт күрсәтә. Алар Перчков, Казанская, Мишанин урамнарында эшли башладылар.
Янгын гидрантларын кардан чистарту мәсьәләсе күтәрелде. Район буенча алар барлыгы 181.

 - Бу эш шулай ук вакытында башкарылырга тиеш, - дип ассызыклады Альберт Валерьевич.