Питрәчлеләр өчен яңа тормыш кагыйдәләре

Нинди чикләүләр гамәлдән чыгарылды һәм хәзер нинди мөһим таләпләрне үтәргә кирәк?

Цифрлы пропусклар системасы гамәлдән чыкты һәм эштән белешмә алу зарурлыгы да юк;
Өйдән чыкканда битлек кию мәҗбүри, сәүдә учреждениеләрендә һәм җәмәгать транспортында битлекләрдән тыш перчаткалар да киеп йөрергә кирәк. Сез үзегездә булган теләсә нинди перчатка кия аласыз;
Азык-төлек кенә түгел, ә башка товарлар сата торган кибетләр, хезмәт күрсәтү өлкәсе оешмалары да эшли башлый;
ЗАГСта язылышу рөхсәт ителә, шулай да тантанада катнашучылар саны 10 кешедән артмаска тиеш;
Массакүләм чаралар үткәрү әле тыела, шул исәптән паркларда, скверларда һәм башка урыннарда да зур чаралар үткәрергә ярамый;
Спорт комплекслары, бассейн һәм кинотеатр әле эшләмәячәк;
Район авыллары арасындагы автобуслар маршрутка чыгачак. "Восточный” Казан автовокзалыннан Питрәчкә кадәр һәм кирегә автобуслар шулай ук йөри башлады;
Ялгызың гына урамда йөрү рөхсәт ителә, шулай да битлек кию мәҗбүри, паркларга керү тыела;
9 һәм 11 сыйныфлар өчен имтиханнар гамәлдән чыгарылмаган, тиздән БДИ расписаниесе игълан ителергә тиеш;
Балалар бакчалары гадәти режимда эшли башлады. Абонент түләвен 12 майдан башлап исәпләү планлаштырыла, әмма әлегә хөкүмәттә бу мәсьәлә турында фикер алышалар;
Балаларны бакчаларга битлек һәм перчаткалар киеп кенә озатырга кирәк. Балалар бакчасына барыр алдыннан баланы педиатр караячак;
Чикләүләрне бозган өчен, мәсәлән, әгәр урамда битлекләрсез йөрсәгез, сезгә штраф салачаклар.
Шул рәвешле, ил акрынлап элек кертелгән чикләүләрдән чыга башлый. Тик коронавирус йоктыру куркынычы әле саклана, шуңа күрә куркынычсызлык кагыйдәләрен үтәргә кирәк. Алар сезгә сәламәтлегегезне һәм тормышыгызны саклап калырга ярдәм итәчәк!

Питрәчлеләргә урамда йөрү рөхсәт ителә. Әмма битлек киеп, ялгыз, социаль дистанцияне саклап кына йөрергә кирәк. Люция Сираҗиева фотосы.