Район эшмәкәрләре өчен шартлар яхшыра

Әлеге чараның максаты - Татарстан Республикасында кече һәм урта бизнес вәкилләренең үзара хезмәттәшлеге дәрәҗәсендә эшлекле климатны яхшырту.
Очрашу фикер алышу һәм идеяләр формалаштыру форматында узды.
- Быел Президент кушуы буенча, без беренче тапкыр әлеге проектны гамәлгә ашырабыз. Анда барлыгы унбиш район катнаша. Бу исемлеккә, безнең карашка, җирле хакимият әлеге территориядә бизнес үсеше өчен стандарт булмаган алымнар кулланырга, конструктив эшләргә әзер булган районнар керде. Без ел башыннан бирле тирәнтен аналитик эш алып бардык. Ачык чыганакларда һәм ябык базаларда табарга мөмкин булган барлык материалларны анализладык. Һәм унбиш районның һәркайсы турында бик кызыклы мәгълүматлар тупладык. Алга таба без ике көнлек интервьюлар сериясе уздырдык, анда без махсус команданы җәлеп иттек. Шуның нәтиҗәсендә безнең заманча бизнесның нинди проблемалар белән очрашуын, эшмәкәргә чынлап та үсәргә комачаулаучы нинди проблемалар барлыгын белдек. Хәзер өченче стадиягә күчтек. Без стратегик сессияләр сериясен уздыра башладык. Питрәч - без килгән дүртенче нокта. Моңа кадәр без Түбән Кама, Бөгелмә һәм Яшел үзән шәһәрләренә бардык. Төрле районнарда урта һәм кече бизнес арасындагы аермаларга килгәндә, әлбәттә, бөтен җирдә үз үзенчәлекләре бар дип әйтергә була. География, логистика, зур шәһәрләрнең якын булуы, төрле тармаклар булу һәм шулай ук башка факторлар бизнес үсешенә нык тәэсир итә. Шуңа күрә беренче карашка кайда да проблемалар бер үк дип әйтергә мөмкин. Барлык районнарда да кадрларның җитмәве, дәүләт финанславы турында сөйлиләр, шулай да проблемалар бөтен җирдә дә бер төрле түгел, аларның үз үзенчәлекләре бар, һәм иң мөһиме, аларның һәркайсын индивидуаль хәл итәргә кирәк. Бу проектның уникальлеге шунда, без урыннарда, барлык детальләрне төгәл эшләп бетерергә һәм булган проблемаларны хәл итү өчен нәрсә эшләргә кирәклеген ачыкларга һәм бизнес өчен үсеш ноктасы табарга тиеш. Питрәч районы турында төгәл сөйләсәк, Казанга якын урнашуның уңай яклары да бар, шулай ук бу кыенлыклар да тудыра. Бер яктан, бик зур сату базары янәшәдә генә, хезмәт ресурсларын куллану чыганагы бар, әмма шул ук вакытта, конкурентлык зур, инфраструктура үсеше катлаулы һәм башка факторлар. бар Әмма моның белән яшәргә һәм эшли белергә кирәк. Монда, һичшиксез, плюслар минусларга караганда күбрәк, дип саныйм, - дип сөйләде безгә бизнес-омбудсмен Тимур Ногманов.
Стратегик сессиядә районның төрле бизнес өлкәләреннән утыз биш эшмәкәр катнашты. Катнашучылар актуаль мәсьәләләр буенча фикер алышыр өчен төркемнәргә бүленде, болар - «Сәүдә һәм хезмәт күрсәтү», «Төзелеш», «Кощак» сәнәгать мәйданчыгын үстерү», «Азык-төлек сәнәгатен җитештерү һәм эшкәртү» һәм «Авыл хуҗалыгы».
- Бу бик файдалы очрашу булды, чөнки һәркем үз проблемасын җиткерде һәм бу сессия ярдәмендә аны хәл итү юллары эзләнде. Әлбәттә, моның нәтиҗәсе әле иртәгә үк булмаячак, ләкин якын киләчәктә уңай үзгәреш булачак. Мондый очрашулар җирле эшмәкәрләрнең мөмкинлекләрен бәяләргә һәм аларга яңа дәрәҗәгә ирешергә ярдәм итәчәк, - дип хәбәр итте «Кыстыбый» челтәренә нигез салучы Азат Нәҗметдинов.
Әлеге сессия кысаларында юл картасы эшләнде һәм районда эшлекле активлыкны күтәрү һәм эшлекле климатны яхшырту буенча кыска вакытлы чаралар планы кабул ителде.