Гражданнар оборонасы юнәлешендә өйрәнүләр нәтиҗәләре буенча Питрәч районы гражданнар оборонасы чараларын үткәрүгә әзер дип таптылар. Әлеге өйрәнүләрдә районның барлык авыл җирлекләре, оешмалар һәм район хакимияте хезмәткәрләре катнашты.
Районда ике көн буе гражданнар оборонасы буенча өйрәнүләр узды. Район үзәге һәм Питрәч районының барлык авыл җирлекләре эвакуация чаралары үткәрүдә катнашты. Әлеге өйрәнүләрнең максаты - мөмкин булган һәрбер гадәттән тыш хәлгә әзерлекне тикшерү. Бик кыска вакыт эчендә эвакуацияләнгән кешеләрне вакытлыча урнаштыру урыннары әзерләү һәм аларны барлык кирәкле әйберләр белән тәэмин итү.
Гадәттән тыш хәлләр килеп чыккан очракта Питрәч районы үз территориясенә Казаннан 36 мең кешене үзенә кабул итәргә һәм урнаштырырга тиеш. Моның өчен районның барлык авыл җирлекләрендә башлангыч эвакуация пунктлары булдырылды. Өйрәнүләргә бер ай кала әзерлек һәм өйрәтү, документлар әзерләү буенча зур эш башкарылды. Казаннан килгәннәрнең исәбен алып баручы төркем, транспорт белән тәэмин итү, элемтә һәм хәбәрдарлык тәэмин итү, яшеренү урыннары оештырылды... Барлык әзерлек эшләреннән соң, алган белемнәр практикада - өйрәнүләрдә файдаланылды.
Төп чаралар район хакимияте бинасында үтте. Гадәти көннәрдә монда кеше күп булмый. Шулай да, өйрәнү көннәрендә коридорларда кеше шактый иде. Ишек төбендә сакчы гына түгел, ә полиция хезмәткәрләре дә кизү торды. Шуны әйтергә кирәк, шәхесен раслаучы документы булмаганнарны бинага кертмәделәр. Икенче катта эвакуацияләнергә тиешле кешеләрне исәпләү төркеме оештырылды. Алты белгеч районның барлык авыл җирлекләренә чылтыратып чыкты һәм Казаннан килүчеләрне урнаштырдылар. Идарә итү төркеме район хакимиятенең кече залына урнашты, шуннан барлык хезмәтләр эше белән идарә итү алып барылды.
Татарстан Республикасы Гадәттән тыш хәлләр министрлыгының Гражданнар оборонасы чаралары бүлеге башлыгы урынбасары Наил Гареев сүзләренә караганда, районның эвокоорганнары һәм гражданнар оборонасы хезмәтләре белән штаб өйрәнүләре Татарстан Республикасы Гадәттән тыш хәлләр министрлыгының төп чаралар планы нигезендә үткәрелә. Минзәлә, Нурлат, Кама Тамагы, Лаеш, Алабуга районнарында да шундый ук эш алып барылган. Питрәч районында барлык хезмәтләр дә диярлек үз бурычларын уңышлы башкарып чыккан. Татарстан Республикасы Гадәттән тыш хәлләр министрлыгы вәкиле транспорт һәм ышыклауны тәэмин итү төркемнәренә эшләрен оештыруга өстәмә гамәлләр кертергә тәкъдим итте. Һәр төркем эшенә аерым-аерым бәя ясаганнан соң, гомуми бәяне билгеләделәр. Тулаем, Питрәч районын эвакуация һәм гражданнар оборонасының башка чараларын үткәрүгә әзер дип таптылар.
Иң мөһим һәм кызыклы язмаларны Татмедиа Telegram-каналында укыгыз
