Сугыш ветераны Михаил Козловка 93 яшь тулды

Аны истәлекле дата белән котларга район башкарма комитеты җитәкчесе Альберт Хәбибуллин, «Кайгырту» халыкка социаль хезмәт күрсәтү комплекслы үзәге директоры Эльвира Хәйруллина килгән иде. Юбилярга котлау открыткасы һәм бүләкләр тапшырылды.

Бу көн  Михаил Васильевич өчен  истә калырлык булды. Башта фронтовик яши торган йорт каршыннан яшь армиячеләр үтте, ә аннары мәдәният бүлеге коллективы аның өчен мини-концерт оештырды. Әлбәттә ветеран мондый сюрпризга шатланып туя алмады.  Ул аларга рәхмәт йөзеннән елмаеп, кул болгады.  Чыгыш ясаучыларга кушылып, танылган «День Победы» һәм «Катюша» җырларын да башкарды.  Олыларның аздан да күңеле була, Михаил Васильевичның да  күңеле тулды, ул күз яшьләрен тыеп кала алмады...