Тормышыбыз тарихы - ЗАГС елъязмаларында

Шуңа күрә үз алларына куелган бурычларны биредә эшләүчеләр аеруча зур игътибар һәм югары җаваплылык белән үтәргә тиеш. Безнең район ЗАГС бүлеге башлыгы Эльмира Нәбиуллина үз һөнәре турында бер могҗиза кебек сөйли, чөнки алар көн саен күпләгән кеше язмышларының шаһитлары булу гына түгел, ә аларның тормышларында катнашучыларга да әвереләләр. Бүген безнең илдә үзләренең һөнәри бәйрәмнәрен ЗАГС бүлеге хезмәткәрләре билгеләп үтә.

Безнең район торак тапшыру буенча рейтингта һәрвакыт югары баскычларда. Соңгы берничә елда гына да яңа торак комплекслар барлыкка килде, кайчандыр кечкенә булган авыллар зур коттедж бистәләренә әверелде. Бүгенге көндә районда теркәлгән кешеләр саны инде 44 меңнән артып киткән. Шул сәбәпле, аерылышучылар һәм өйләнешүчеләр саны да арта. Өйләнү яки кияүгә чыгу яше елдан-ел үсә, хәзер яшьләр якынча 30 яшьтә өйләнешәләр икән. Бу гаилә корганчы “аякка басу” теләге белән бәйле.
Тантаналы рәвештә никах теркәү инде модада түгел. Хәзер яшь парлар тыныч кабинетта язылуны өстен күрә, ә аннары инде башка бер урында күчмә теркәлү уздыралар. Мондый парлар 60 процентка якын. ЗАГС никахларны учреждениедән читтә теркәми, чөнки ул дәүләт органы һәм коммерция эшчәнлеге белән шөгыльләнергә хокуклы түгел. Мәхәббәткә бернинди дә киртәләр юк диләр, шуңа күрә монда да искәрмә бар. Әйтик, ЗАГС хезмәткәрләре тарафыннан күчмә теркәлүнең сәбәбе - Пановка авылында төзәтү колониясендәге туй булырга мөмкин, хөкем ителгәннәр биредә еш кына иректә булган кәләшләре белән язылыша.
Әмма туй – ул әле олы юлның башы гына, гаиләне саклап калырга да кирәк. Соңгы унбер ай нәтиҗәләре буенча, районда 155 пар язылышкан булса, 100 пар аерылышкан. Гаиләне балалар ныгыта. Быел 61 питрәчленең беренче баласы туган, 86 хатын-кыз икенче, 34е өченче баласын тапкан. 14 гаиләдә дүрт һәм аннан да күбрәк бала бар. Соңгы елда барлыгы 196 бала туган, шуларның 106сы малай һәм 90ы кыз. Өч пар игезәкләрнең әти-әнисе булган. Татар гаиләләрендә әти-әниләр балаларына еш кына Әмин, Инсаф, Саминә, Самир, Искәндәр, Ләйлә исемнәрен бирәләр икән. Рус гаиләләрендә Федор, Сергей, Даниил исемнәре аеруча популяр. Сирәк исемнәр арасында Мирон, Марк һәм Усейн. Әти-әнисе бүләк иткән исем балага ошамаса, ЗАГС хезмәткәрләре бу мәсьәләдә дә ярдәм итә алалар. Балигъ булган кеше үз теләге белән исемен, фамилиясен һәм атасының исемен теләсә кайсы башка исемгә алыштыра ала.
ЗАГС хезмәткәрләре әйтүенчә, иң күңелле эш - уллыкка алу актын язу. Тагын бер баланың гаилә канаты астына сыенуын аңлау бик күңелле бит.
- Эш барышында инде үз сынамышларыбыз да барлыкка килде. Әйтик, үз балалары булмаган пар уллыкка бала ала икән, бу гаиләдә күптән көтелгән сабый туу ихтималы зур. Мондый хәл берничә тапкыр булды, - ди район ЗАГС бүлеге җитәкчесе Эльмира Нәбиуллина.
Икенче сынамыш мөһер белән бәйле. Шкафта ЗАГС хезмәткәрләренең ике мөһере саклана, аларның берсе аерылышу документына, ә икенчесе никах теркәлгән очракта куела. Әгәр дә пар аерылышуга килгән, ә ЗАГС хезмәткәренең кулы теркәү мөһеренә тартыла икән, гаиләнең сакланып калу мөмкинлеге зур.
Әлеге дәүләт органы хезмәткәрләре кеше тормышында иң соңгы документны - үлем турында таныклык та бирәләр.
- Безнең эштә иң авыры - балалар үлеме турында таныклык рәсмиләштерү. Моны күңел аша үткәрмичә булмый. Кечкенә балалары булган яшь кешеләрнең гомере өзелү бик авыр. Мондый вакыйгалар безнең өчен шәхси фаҗигагә тиң, - дип сөйләде Эльмира Борисовна.

Аерылышырга килгән һәр пар бушлай психологик хезмәт алу өчен Казанның Үзәк ЗАГС бүлегенә мөрәҗәгать итә ала. Анда һәр гаилә белән профессиональ психолог-медиаторлар эшли, алар гаилә мөнәсәбәтләренең төрле кризисларын хәл итәргә булыша. Безнең районда да белгечләр ярдәмендә гаиләләрен саклап кала алган парлар бар.