Тоткыннар да хәбәрдар

Күптән түгел район Пенсия фонды идарәсе Пановка төзәтү колониясенә чираттагы күчмә клиент хезмәте белән баруны оештырды. Анда хөкем ителгәннәр арасында пенсия законнары буенча аңлату эшләре алып барылды.
Консультация сорап 39 кеше мөрәҗәгать итте. Аларны пенсия билгеләү, түләү, кабат исәпләү, индексацияләү һәм бер тапкыр бирелә торган түләү мәсьәләләре кызыксындырды. Барлык тоткыннар да идарә белгечләреннән төпле җаваплар алды.
- Хезмәт хакы буенча пенсияне кабат исәпләргә буламы? - дип сорады картлык буенча пенсия алучы тоткын Госман. Аңа барлык кирәкле документларны җыеп тапшырганнан соң, мөрәҗәгать иткән айның икенче аеннан пенсия кабат исәпләнеп бирелә.
Яшь тоткыннарны башка сораулар кызыксындырды. Мәсәлән, 22 яшьлек Владимир туендыручысын югалту буенча социаль пенсия ала. Ул апрельдә индексациядән соң пенсиясенең күпмегә артуы турында сорады. Идарә белгече пенсиянең 17,1 процентка артуын, ягъни аның социаль пенсиясе 631 сум 39 тиенгә артуын хәбәр итте. 1994 елгы Руслан эшкә урнашкан очракта, федераль социаль өстәмә түләүләр алачакмынмы, дип кызыксынды. Ул әлеге өстәмә түләүнең эшкә сәләтсезләргә генә түләнүен белде.
Пенсия законындагы үзгәрешләр белән тоткыннар гына түгел, ә колония хезмәткәрләре дә кызыксынды. Барлык сорауларга төпле җаваплар бирелде. Төзәтү колониясенең төп бинасында консультациядән тыш, пенсия тематикасы стенды да яңартылды.
Бу көнне күчмә клиент хезмәте Пановка авыл җирлегендә дә булды. Анда гражданнарны кабул итү буенча консультация һәм пенсия законы мәсьәләләренә аңлатма бирү пункты эшли. Авыл җирлеге бинасында да стендлар яңартылды, пенсия тематикасына газеталар, брошюралар һәм лифлетлар яңартылды.