Туган телне кадерлиләр, яраталар, онытмыйлар

Диктант берьюлы берничә аудиториядә узды. Аны язарга 70кә якын питрәчле – укучыларның ата-аналары, район үзәге оешмалары, учреждениеләре хезмәткәрләре килгән иде. Биредә ел саен грамоталылыгын тикшерүчеләр дә, беренче тапкыр килүчеләр дә булды. Акциядә катнашучылар парта артында үз урыннарын алгач, аларның кыюлыгы бераз артты. Алар үзләренең укучы булган вакытларын искә төшерделәр. Бүген алар, инде өлкәннәр, шул хисләрне кабат кичерделәр.
- Үзем курыкмыйм да кебек, шулай да  дулкынланам, - диде Рунисә Әхмәтшина.
- Мин икенче тапкыр диктант язам. Борчылмыйм, - диде Зәбидә Абдуллина. – Минем өч улым бар, алар миңа мәктәп программасын онытырга ирек бирмәделәр. Кичләрен дәреслекләр белән утырабыз, татар теле кагыйдәләрен дә бергәләп өйрәнәбез, - диде ул елмаеп.
Диктант язуда катнашу татар телен үстерә, грамоталы язуны популярлаштыра.
Диктант өчен Роберт Миңнуллин әсәреннән һәркемгә аңлаешлы өзек сайлап алынган иде. Текстны татар теле укытучылары укыды.
- Барысы да яхшы язар дип өметләнәбез. Акциягә килгән кешеләр туган телне кадерләүләрен, яратуларын, онытмауларын исбатладылар, - диде татар теле укытучысы Галина Чукурова.