Тамара Кузинаны белә-белгәннән гел китап өстенә иелеп, укып утыруы күз алдымнан китми.
Оренбург өлкәсенең Медногорск шәһәре кызына китапка мәхәббәтне әнисе тәрбияләгән. Ата-ана йортында зур китапханә була. Анда күбрәк рус классикасы туплана. Менә шушы китаплар аша кызда бик яхшы грамоталылык, күп белү, рухи байлыкка нигез салынган. Редакциягә килеп эшли башлагач та, ул бөтенебезгә "китап җене" ияртте.
Берничә эш урыны алыштырган Тамара Александровнаны язмыш тикмәгә генә безгә китермәгәндер. Редакция бусагасын атлап кергәндә, аңа утыз яшьләр тирәсе була. Элек радиода эшләп алган талантлы хезмәткәр, редакция коллективына бик җиңел кереп китә. Көндәлек социаль темаларга, кешеләр турында язган материалларын халык яратып укыды. Хәбәрче буларак, ул кешеләрне борчыган мәсьәләләрне күрә һәм күтәрә, аларны анализлап яза иде.
Безнең язу эше, беренче карашка, бик җиңел кебек. Юк шул. Һәрдаим эзләнергә, тормыш агышыннан калышмаска, теманы гади халык аңларлык итеп ача да белергә кирәк.
Газета туймас сыер кебек ул. Көн саен материал табарга, язып өлгерергә кирәк. Көн саен: "Бу газетага нәрсә языйм икән?" дигән сорау башта кайный. Ә бит көйсез укучылар да була. Чөнки гел мактап, баштан сыйпап кына тормыйбыз.
Тамара Александровна әзерләп, язган материалларның, очрашуларның, интервьюларның санын исәпләп бетерү мөмкин түгел. Бик күп укучыларыбыз әле дә аның язган материалларын сагынып искә ала. Аның өчен куанып бетә алмыйбыз. Бу ярату олы хезмәт җимеше. Тамара кеше күңеленә үтеп керерлек итеп, эчкерсез, гади телдә яза белә иде. Ул беренче карашка күзгә ташланмый торган кешелек сыйфатларын күрә һәм шул турыда матур итеп язды.
Иҗат кешесе язу турында өйдә дә, эштә дә гел уйлый. Туачак материалны башында кат-кат эшкәртә, шуннан соң гына кәгазьгә төшерә. Безнең Тамарабыз да шундый тынгы белмәс хәбәрче, чын газет кешесе иде. Бүген ул лаеклы ялда. Ире Александр, балалары, оныклары янәшәсендә гомер кичерә.
