Якташларыбыз - Советлар Союзы Геройларының кече ватаннары буйлап автойөреш матур традициягә әйләнде. Быел Бөек Җиңүнең 69 еллыгы алдыннан район ветераннары, ДОСААФ хезмәткәрләре һәм яшьләр Геройларның туган авылларында булды.
Алар иртәнге унынчы яртыда бәйрәмчә бизәлгән 10 җиңел автомашина белән Советлар Союзы Геройлары Галимҗан Камалиев, Василий Осипов, Петр Гаврилов һәйкәлләренә венок һәм чәчәкләр салу өчен юлга кузгалды.
Автойөрештә район үзәге мәктәпләре укучылары, район хәрби комиссариаты вәкилләре, ветераннар, "Яшь гвардия" әгъзалары катнашты.
Җиңү символы, Россия һәм Татарстан дәүләт флаглары белән бизәлгән автомобильләр кортежы башта Питрәч авылындагы һәлак булган сугышчылар һәйкәле янына килеп туктады. Кыска вакытлы митингтан соң венок һәм чәчәкләр салды.
Ә Ленино-Кокушкинода автойөрештә катнашучылар Советлар Союзы Герое Галимҗан Камалиевны искә алды. Район хәрби комиссариаты вәкиле, майор Фәрит Вәлиев Герой батырлыклары турында җентекләп сөйләде, ул Днепрны кичүдә күрсәткән батырлыклары өчен югары исемгә лаек булган.
Олы Бутырка авылы илебезгә Советлар Союзы Герое Василий Осиповны бүләк иткән. Туган авылында Геройга һәйкәл куелган. Бу көнне анда да чәчәкләр һәм венок салынды, һәйкәл янында җирле мәктәп укучылары почетлы каравылда торды.
Автойөрешнең соңгы этабы Петр Гаврилов исеме белән бәйле. Күндә дә митинг булды, Петр Гаврилов бюстына һәм һәлак булганнар һәйкәленә венок һәм чәчәкләр салынды. Петр Гавриловның туган авылындагы музее аеруча соклану уята.
Хезмәт ветераны Афанасий Слепнев Геройның туган авылы Әлбәденгә кайткач, бергәләп балык тотуларын искә алды. Ул шулай ук якташының Брест крепостендагы батырлыклары турында сөйләде. Ветеран Габделбари Кәримов Петр Гавриловның район торак пунктларында йөреп, авыр язмышы, крепостьне ничек саклавы турында сөйләвен искә алды.
Әйе, яшь буын Герой якташларыбыз турында белә: фильмнар карый, әдәби әсәрләр укый. Әмма автойөрештә катнашу һәм Геройлар бюстларына чәчәкләр салу - онытылмаслык вакыйга.
