Питрәч авылында “Питрәч таңнары” халык иҗаты фестивале узды

Кунакларны халык җырлары, ипи һәм тоз белән каршы алдылар. Шулай итеп сәламләү гадәте күп халыклар өчен тирән мәгънәгә ия: ипи байлык һәм иминлекне белдергән, ә тоз кешене дошман көчләреннән һәм йогынтыларыннан саклау чарасы булып саналган. Фестиваль мәйданчыгы тирәсендә “һөнәрчеләр авылы” урнашты, анда республиканың төрле районнарыннан һәм шәһәрләреннән килгән осталарның кулланма сәнгате эшләнмәләре тәкъдим ителде.

Шунда ук туклану зонасы оештырылды. Кулинар өлешнең үзенчәлеге булып күчмә рус миче булды, анда теләгән һәркем кызарып пешкән тәмле һәм гадәти булмаган пироглар белән сыйлана алды.

Сәхнәдә районның иң яхшы фольклор коллективлары чыгыш ясады. Быел алар унау иде. Үз номерлары һәм костюмнары белән алар һәр халыкның милли колоритын тапшыра алды.

Званка авылыннан “Огоньки” коллективы фестивальдә беренче тапкыр катнаша. Алар халык җырларын гадәти булмаган башкарулары һәм яшь коллектив булулары белән аерылып торалар.

– Безне бу бәйрәмгә чакыруларына бик шатбыз. Мондый чаралар халык фольклорын, горефгадәтләрен һәм йолаларын саклап калу өчен мөһим. Без яшь коллектив һәм барысы да халык җырларын рәхәтләнеп өйрәнә, әмма репертуарыбыз киң, – дип уртаклашты ансамбльнең бер солисткасы Гөлфинур Мәхмүтова.

Быел фестиваль Авыл көненә багышланды. Шуңа күрә бәйрәм вакытында районның иң яхшы хезмәткәрләрен һәм төрле оешмаларны бүләкләделәр, алар җәй дәвамында авыл халкын үзләренең аллы-гөлле бакчалары һәм чистапөхтә территорияләре белән сөендерделәр.

Шәхси йортлар арасында иң матур территория Чишмәле урамыннан Хәмидуллиннар гаиләсенең йорт яны территориясе булды.

– Бу минем өчен күңелле сюрприз булды, чөнки мине беренче тапкыр шулай бүләклиләр. Мин үз йортым янында төрле чәчәкләр үстерәм, ләкин иң яраткан чәчәгем – петуния. Мин белгән бу чәчәкнең барлык сортларын үстерергә тырышам. Шулай ук Ленино-Кокушкино һәм Татар Тау Иле чишмәләрен дә төзекләндерәм. Чишмәләр минем өчен изге урын, шуңа күрә аларга күңелем тарта, – дип уртаклашты Гәүһәрия Хәмидуллина.

Шулай ук спорт ярышлары өчен мәйданчык оештырдылар. Монда иң көчле, җитез һәм кыю питрәчлеләр перекладинага тартылу, озынлыкка сикерү, мас-рестлинг һәм армрестлинг буенча бер-берсе белән ярыштылар. Җиңүчеләр кыйммәтле бүләкләр алдылар.