Питрәч җирендә сәләтле балалар үсә

"Питрәч йолдызчыгы" конкурсының сайлап алу турларында район авыл җирлекләреннән алты йөздән артык үзешчән талант катнашты. Конкурсны оештыручылар аларның елдан-ел артуын әйтеп узды. Үзешчән артистлар "Вокал-соло", "Конферансье", "Вокаль ансамбльләр", "Хореография" номинацияләрендә үз сәләтләрен күрсәтте. Беренче һәм икенче сайлап алу турларында абруйлы жюри 84 призлы урын билгеләде. Конкурс районның яңа "йолдызчыкларын" ачыклады. Алар барысы да талантлы, сәләтле. Гала-концерт көнне мәдәният йортына килгән питрәчлеләр балаларның сәхнә осталыкларын күреп сокланды.Шунысы сөенечле, йолдызчыклар арасында иң кечкенәләр дә бар иде. Мәсәлән, дүрт яшьлек Сөмбел Мифтахова (вокал) һәм Артем Вәлиев (конферанс), шулай ук "Барбарики" бию төркемендә катнашучылар ("Кыңгыраучык" балалар бакчасы) чыгышы күпләрнең хәтерендә озак калыр әле. Алар беренче урын өчен дипломга лаек булды. Монда Анна Тиханова (вокал-соло), Алмаз Раимов (конферансье), Ксения Коровина (вокал-соло) һәм район сәхнәсенә тәүге тапкыр күтәрелүче бик күпләрнең исемнәре яңгырады. Район администрациясеннән килгән башкарма комитет җитәкчесе Азат Вәлиуллин һәм аның урынбасары Валентина Урысова "Питрәч йолдызчыгы" конкурсында җиңүчеләрне диплом, истәлекле призлар белән бүләкләделәр.
Шуны әйтергә кирәк, кунаклар республика, халыкара фестивальләре лауреатлары һәм дипломантлары үзләренең чыгышлары белән бәйрәмгә тагын да ямь өстәде. Алар да кайчандыр сәнгатькә юлны "Питрәч йолдызчыгы" конкурсыннан башлап җибәргән. Мөгаен, быелгы призерлар өчен дә район конкурсы киләчәк юлларында тәүге баскыч булыр. Мондый конкурслар балаларга, укытучыларга үзләрен, сәләтләрен, талантларын күрсәтү, үсү мөмкинлеге бирә. Ә моның өчен бөтен шартлар да бар. Бу атнада Питрәч районында "Созвездие-Йодызлык" республика фестиваленең зона туры үтәчәк. Анда Питрәч районы гына түгел, ә республиканың күрше өч районыннан сәләтле балалар үз сәхнә осталыкларын күрсәтәчәк. Талантлар балкышы дәвам итә!