Шәле авылының балалар бакчасында яшь питрәчлеләр катнашында конкурс узды

Татар милли киемнәрендә ундүрт кыз һәм тугыз малай төрле иҗади сынаулар үтте. Кызлар татар милли ризыгы өчпочмак пешерделәр, малайлар тактага кадак кадаклый белүләрен күрсәттеләр. Яшь конкурсантлар җырладылар, биеделәр, татар халкының гореф-гадәтләрен, йолаларын белүләрен күрсәттеләр. Аларның чыгышын абруйлы жюри бәяләде, аның составында якташыбыз, язучы Камил Кәримов та бар иде.
Кызлар арасында Шәле авылының «Тургай» балалар бакчасында тәрбияләнүче Ясминә Сафиуллина җиңүче булды. Ә «Татар малае» бәйгесендә беренче урынны Ленино-Кокушкино авылының «Родничок» балалар бакчасында тәрбияләнүче Сәфәр Минһаҗев алды.