Илдус Нәҗметдиновның һөнәре язмыш тарафыннан билгеләнгән

Илдус Нәҗметдиновның һөнәре язмыш тарафыннан билгеләнгән, чөнки ул укытучылар гаиләсендә туган. Аның 43 ел гомере мәктәптә, укучылар янәшәсендә узган.   
- Мин 1979 елда укытучы булып эшли башладым. Армиядә хезмәт итеп кайткач, туган ягымда Саба районында мәктәпкә эшкә урнаштым, - дип сөйли Илдус Фәритович.

Ул физкультура, хезмәт, тарих фәннәрен укыткан. Соңрак директор булып эшләгән.

- 10 елдан соң язмыш мине, ул чакта минем өчен чит булган Питрәч районына китерде. Район мәгариф бүлеге мөдире, мәрхүм Илдус Абдрахман улы миңа Кәвәл мәктәбенә директор булып урнашырга тәкъдим итте. Мин риза булдым, - ди ветеран.

Аның килүе белән мәктәп бөтенләй үзгәрә: анда тагы да уңайлы, җылы мохит барлыкка килә. Яңа директор балаларга да, хезмәттәшләренә дә яхшы булсын дип тырыша. Беренче эш итеп бинада газ үткәрелә. Аннан мәктәп яны территориясен төзекләндерәләр. Бакча гөрләп тора, умарталык барлыкка килә, бакчада укытучылар ел саен балалар белән бергә яшелчә үстерәләр…

Илдус Нәҗметдинов тормышларында бәхетсезлек булмаган булса, бу мәктәпне калдырып китмәгән булыр иде.

- Безнең фатир янды, һәм без Екатериновка авылына күчтек. Мин җирле мәктәпкә шулай ук директор буларак күчтем, - дип искә ала ул.

Екатериновкада ул пенсиягә кадәр эшли. Илдус Нәҗметдинов лаеклы ялга ике ел элек чыккан. Әмма аның үпкәсе бар, хәзер аңа үзен онытканнар кебек тоела…

- Мин эшсез утырырга яратмыйм һәм теләмим дә. Көннәр буе бакчада эшлим, калган вакытта умартачылык белән шөгыльләнәм. Кызларым һәм оныкларым миндә еш кунак була. Ә мәктәпләрдә хәзер искә төшермиләр. Картларга, бәхет өчен күп тә кирәкми бит: бер җылы сүз һәм кечкенә генә котлау открыткасы да җитә. Без бик күп эшләдек, көне-төне диярлек эштә булдык, никадәр балага тәрбия бирдек, - дип хис-кичерешләре белән уртаклашты Илдус Фәритович.

Әңгәмәбез ахырында ул үзенең элеккеге хезмәттәшләренә, педагогик хезмәт ветераннарына, яшь укытучыларга изге теләкләрен җиткерде.