Питрәч беренче мәктәбе укучысы Аделина Зарипова: «Күчерергә рөхсәт итмим, әмма үз ярдәмемне тәкъдим итәм»

Аделина укытучылар гаиләсендә туган. Әнисе Алия Газизовна кызы укый торган мәктәптә башлангыч сыйныф укытучысы булып эшли. Әтисе Флорид Фәритович химия һәм биология укытучысы, элек шул ук мәктәпнең директоры булган, хәзер коррекция интернат-мәктәбе белән җитәкчелек итә. Баланың уңышлары үзенә генә түгел, ә әтиәнисенә дә бәйле. Әгәр дә олылар балаларының белем алуына битараф булсалар, алар начар укырлар иде. Аделина белән балачактан ук яхшы белем алуның мөһимлеге турында сөйләшүләр алып барганнар.

– Әнием һәрвакыт яхшылыкка омтылырга, яхшы укучы булырга кирәклеген әйтте. Башлангыч сыйныфларда өйгә бирелгән биремнәрне бергә эшләдек, аннары мин аларны үзем башкара башладым. Әгәр дә ялкаулансам, мине мәҗбүр иттеләр. Бүген инде үсә төшкәч, мин аларга катгый тәрбияләгәннәре өчен бик рәхмәтлемен, – ди кыз.

Ләкин бу Зарипованың көндәлегендә гел бишле билгеләре генә дигәнне аңлатмый. Бик сирәк кенә икеле дә алганы булган. Бер тапкыр өй эшен эшләмәгән өчен куйганнар. Укучы бу хәлне тыныч кабул итә, соңрак билгесен төзәтә. Шуңа күрә аның отличница синдромы юк.

«Бүген эшлисе эшеңне иртәгегә калдырма – мин һәрчак әлеге гади, шул ук вакытта бик мөһим кагыйдәгә таянам, бу миңа укуда гына түгел, ә тормышның башка өлкәләрендә дә ярдәм итә».

Тормышта ялгышулар да, уңышсызлыклар да булырга мөмкин, Аделина моны яхшы аңлый. Белем җиңел бирелми һәм җиңел бирелергә тиеш тә түгел дип саный, югыйсә алган белем баштан бик тиз чыгып китәчәк.

– Шуңа күрә мин күчерергә рөхсәт итмим, әмма классташларым аңлап бетермәгән кайбер темаларны аңлатып җибәрә алам. Алар миңа аңлатуымны сорап мөрәҗәгать итәләр, үзләре сорамасалар ярдәмемне тәкъдим итәм, – диде ул.

Аделинаның көне бик иртә башлана, мәктәпкә аны әти-әнисе эшкә барышлый алып килә, шуңа күрә ул һәрвакыт сыйныфташларыннан беренче булып килә. Дәресләр сәгать 8.00дә башланса да, ул инде 7.30да парта артында утыра һәм өй эшләрен кабатлый. Әгәр дә җавап бирергә әзер булуына ышанса, дәрескә кадәр яшьтәшләре белән аралашып ала. Кичен өй эшләренә багышлый. Бу ике сәгать чамасы вакыт ала, калган вакытта БДИ белешмәлегеннән тестлар чишә. Башкаларга караганда аны күбрәк табигый-фәнни предметлар кызыксындыра.

– Миңа химия һәм биологиягә мәхәббәтне әтием уятты. Без урманда йөргәндә, ул һәрвакыт төрле үсемлекләр турында сөйләде, табигать турында кызыклы фактлар белән уртаклашты, – дип искә ала кыз.

Ул укытучылар династиясеннән булса да (әтисе ягыннан әби-бабасыннан башлап), башка һөнәри юл сайларга тели. Медицина университеты студенты булырга, нинди дә булса өлкәдә табиб, фармацевт яки биолог булырга планлаштыра.

– Мин инде тугызынчы сыйныфтан соң имтихан тапшырдым, аның нәрсә икәнен аңлыйм, тәҗрибәм бар. Бездә кирәкле белем бирә торган көчле укытучылар бар. Шуңа күрә, минемчә, барысы да яхшы булачак, һәм мин укырга керү өчен җитәрлек баллар җыячакмын, – дип билгеләп үтте чыгарылыш сыйныф укучысы.

БӘЯЛӘМӘ

Беренче мәктәп директоры Нина Утяганова:

– Аделина Зарипова яхшы укый, шулай ук һәр елны татар теле буенча республика предмет олимпиадасында катнаша, призер булды. Быел биология буенча олимпиадага барырга планлаштыра. Алтын медальгә дәгъвачы булып тора, хәзер үк БДИ буенча сынау тест биремнәрен үтәгәндә яхшы нәтиҗә күрсәтә.