Питрәч икенче мәктәбе - Татарстанда иң күп китап укучы

Марафонда катнашучылар өч атна дәвамында көн саен татар телендәге әсәрләрне укыдылар һәм конкурсның исеме хэштегы белән социаль челтәрләрнең берсендә өзекләр урнаштырдылар.
- Мин марафонда инде өченче тапкыр катнашам. Быел бик күп шигырьләр һәм хикәяләр укыдым. Кайбер китапларны китапханәдән алдым, - диде 7 «Г» сыйныфы укучысы Даниил Спичков.
Район үзәгенең икенче мәктәбен Татарстан Республикасында иң күп укучы мәктәп буларак кубок белән бүләкләделәр. 7-10 сыйныфларда укучы унсигез балага истәлекле дипломнар, ә укытучылар Елена Галәветдинова, Гөлназ Сафина һәм Лилия Гатиатуллинага исемле кубоклар тапшырылды. Бүләкләү тантанасы Казанда туган тел көнендә узды.
- Төп бүләкне алуыбыз бик куанычлы. Мин укучыларым белән чиксез горурланам, - дип тәэсирләре белән уртаклашты Елена Галәветдинова.
Гадәти булмаган проектны оештыручылар - Татнетны үстерү фонды һәм Татар китап нәшрияты. Проектның максаты - яхшы гадәт - татарча әдәби әсәрләр, китаплар уку гадәтен формалаштыру.