Ил белән бергә йөгердек

"Милләтләр кроссы" беренче тапкыр 1918 елда уздырыла. Бу вакытта 4,5 километрга йөгерәләр. Шуннан бирле бу чара безнең илдә ел саен уздырыла. Ә "Милләтләр кроссының" дөньяви яшенә 150 ел чамасы.
Наратлыкта узган чарага бар кеше дә әзерлек белән килгән иде. Әйтергә кирәк, бу көнне Татарстан гына түгел, бөтен күпмилләтле Россия йөгерде.
Бу көнне һава торышы да бик матур иде. Наратлыкта иртәдән кояш балкыды, әйтерсең лә җәйге көн. Гадәттәгечә, йөгерүне балалардан башладылар. Иң кечкенәләрнең яше 6-9 яшьләр тирәсе иде. Кызлар арасында бер километр араны иң беренче булып Питрәчтә яшәүче Кристина Игнатьева килде. Егетләр арасында җиңүче - Сабит Янов. Ирләр арасында беренчелекне Богородскида яшәүче Максим Гаврилин алды. Икенче урында "Ак Барс" агрофирма хезмәткәре - Илдар Миндегулов. Өченче урынны Богородскидан Олег Сорокин һәм Питрәчтән Руслан Ларионов бүлеште. Хатын-кызлар арасында беренче урында Кощактан Алина Гәләвиева, икенче урында "Ак Барс" агрофирма хезмәткәре Жанна Лывина, өченчедә - Питрәчтән Лилия Шиһапова.
Ветераннар да читтә калмады, алар хәтта яшьләрне уздырып та җибәрде әле. Алар арасында беренче урыннарны икенче мәктәпнең физкультура укытучысы Михаил Чернов, "Питрәч-Арена" ябык боз инженеры Наил Вәлиев һәм коррекция мәктәбе тәрбиячесе Равил Әхмәтов алды.
Ә менә район оешма вәкилләре арасында Питрәч эчке эшләр бүлеге хезмәткәрләре Илшат Абдуллин һәм Юрий Шатаевлар беренче ике урынна алды. Өченче булып халыкны социаль яклау идарәсе хезмәткәре Филүс Хөсәенов килде.
Кызганыч, күпмеңле Питрәч районнынан "Милләтләр кроссында бары 400 генә кеше катнашты. Шундый тәкъдим дә бар: киләсе елга йөгерү бәйрәменең маршрутын үзгәртеп булмас микән. Автовокзалдан наратлыкка кадәр йөгереп карыйк мәллә?