Районыбызда Өлкәннәр ункөнлеге матур чара - бергә 50 һәм күбрәк еллар яшәгән парларны хөрмәтләү белән башланды. Ул район үзәгендәге мәдәният йортында алып барылды.
1 октябрь көнне мәдәният учагында бөтенләй башка - бәйрәмчә халәт иде. Шулай булмый ни! Монда ярты гасыр һәм күбрәк еллар бергә канат каккан бәхетле парларны тәбрикләделәр бит.
Бу көнне Шәледән Әхмәтҗановлар, Шихаздадан Закаловлар, Олан Иленнән Тубановларны котладылар. Бәйрәмгә Пимәрдән Хөсәеновлар гаилә пары да чакырулы иде. Әмма алар кайбер сәбәпләр аркасында район үзәгенә килә алмады. Шуның өчен сәхнәгә өч пар күтәрелде.
Монда алар өчен җыр, музыка яңгырады. Өлкән парларны район башлыгы Эдуард Дияров үзе килеп котлады. Ул һәр парга бүләкләр тапшырды, аларга эчкерсез рәхмәт сүзләрен җиткерде.
- Сез, кадерлеләребез, аерым игътибарга, хөрмәткә лаек. Без сезнең тормыш тәҗрибәсенә, киңәшләрегезгә мохтаҗ. Сезнең ныклыкка, гаилә кадерен белүегезгә, бетмәс- төкәнмәс ихтыяр көчегезгә сокланабыз. Сез туган илгә, туган җиргә тугрылык үрнәге булып торасыз. Сездән илебезне яратырга, эшкә җаваплылыкка, батырлыкка һәм шәфкатьлелеккә өйрәнәбез, - диде ул.
Казан кунагы - Татарстан республикасында наркотиклар әйләнешен күзәтү буенча федераль хезмәт идарәсе башлыгы урынбасары Сергей Каменев җылы котлауларын җиткерде.
Юбилярларны котларга балалары да килгән иде. Мәсәлән, Шәледән Әхмәтҗановларның уллары әти-әниләрен уллары буларак та, җирле хакимият исеменнән дә тәбрикләде.
Шихаздадан Закаловлар гаилә пары балаларыннан гына түгел, онык балаларыннан да кабул итте. Билгеле, шундый хөрмәткә, олылауга күнекмәгән өлкәннәрнең күзләренә яшьләр килде. Бу бәхет яшьләре иде. Шушы кадәр гомер кичереп, исән-сау булу, туганнар һәм якыннар әйләнәсендә юбилейларын каршылау үзе бәхет түгелме соң?
- Тормышта төрле чаклар булды: яхшысы да, начары да... Бергә 60 ел яшәп кара әле! - диде соңрак әңгәмә вакытында Мария Романовна Закалова. - Гомер буе кош караучы булып эшләдем. Ирем Иван Павлович слесарь, комбайнчы иде. Өч бала тәрбияләп үстердек. Алар безгә җиде онык һәм җиде онык баласы бүләк итте.
- Олан Иленнән Тубановлар бергә 55 ел. Алар да тормышларыннан канәгать, балаларыннан һәм оныкларыннан кадер-хөрмәт күреп яшиләр.
Шәледән Әхмәтҗановлар гаилә пары да биш бала табып, аякка бастырган.
- Бер-беребезне аңлап, санлап тордык. Бик тату яшәдек, Аллага шөкер. Хәзер дә бик яхшы яшибез, - диде.
Өлкәннәрнең ачык күңелле, тормыш кадерен, ямен белеп яшәүләре безне сөендерә, билгеле. Без барыбыз да алар өчен шат, Ходай тагын гомерләр насыйп итсен үзләренә.
Бүген Питрәч районында 6243 пенсионер яши. Шуларның 31е Бөек Ватан сугышында катнашучы. 1020 кеше 80 яшьтән узган, 90 һәм артыграк яшьтәгеләр 70 кеше.
Иң мөһим һәм кызыклы язмаларны Татмедиа Telegram-каналында укыгыз
