Питрәч РЭСы хезмәткәрләре безгә үз эшләре турында сөйләде

Эдуард Левицкий, баш инженер

- Бу эшкә 1994 елда Казан энергетика институтын тәмамлауга ук мастер булып урнаштым. Ике елдан соң баш инженер итеп куйдылар. Минем төп бурычым - техник хезмәт күрсәтү эшен оештыру, персонал белән эшләү. Аварияләр булган урынга еш кына җитешсезлекләрне бетерергә чыгабыз. Табигать көйсезләнгәндә давыл, буран булганда аварияләр  берьюлы берничә урында килеп чыга.
Мәсәлән, кышын да  проблемалар килеп туа. Боз катып чыбыклар өзелгән очраклар да була. Бу чорда эшләү кыенрак – тирән кардан йөрергә туры килә, өстәвенә, урамда да тиз караңгылана. Шуңа да карамастан, безнең белгечләрнең яңа техникасы һәм осталыгы барлык җитешсезлекләрне вакытында бетерергә һәм халыкны ышанычлы, сыйфатлы электр белән тәэмин итәргә мөмкинлек бирә.
Эштән тыш ау һәм балык тоту белән мавыгам, шулай ук бакчада эшләргә яратам.

Александр Дорофеев, баш контролер

- Безнең район буенча 15 меңнән артык электр счетчигы бар. Без аларны план буенча елга 2 тапкыр тикшерәбез.
Баш  контролер вазыйфасында мин 2016 елдан бирле эшлим. Моңа кадәр 10 ел контролер идем. 2006 елда энерготехникумны тәмамлап, эшкә урнаштым. Хәзер минем эшем артты, әлбәттә.
Минем кул астында 5 контролер. Безнең эш җиңел түгел. Баганаларга урнаштырыла торган счетчиклар пәйда булды, алар белән дистанцион рәвештә эшләргә була. Бу безнең эшне җиңеләйтә. Минем төп бурычым - мәгълүматларны анализлау, документлар әзерләү һәм башка бик күп нәрсәләр. Счетчикларны тикшерүдән тыш, тәртип бозучыларны да ачыклыйбыз.
Буш вакытымда спорт белән шөгыльләнергә яратам, «Олимп» командасы составында волейбол буенча район беренчелегендә катнашам, футбол уйныйм.

Евгений Лукоянов, электромонтер

- Мин Казанда туып-үстем. Питрәчтә 2005 елда энерготехникумны тәмамлаганнан соң электромонтер буларак эшли башладым.
Безнең бригадада өч электромонтер һәм мастер. Аварияләрне бетерүдән тыш, без электр баганалары урнаштыру, техник хезмәт күрсәтү белән дә шөгыльләнәбез. Мәсәлән, Шәле һәм Керәшен Сәрдәсендә күптән түгел электр баганалары алыштырылды. Без тәүлекнең теләсә кайсы вакытында элемтә аша, авария урыннарына чыгабыз. Төрле шартларда - яңгыр, кар, тәүлекнең караңгы вакытында эшләргә туры килә…
Ике ай дәвамында без Зәйнең уку полигонында югары киеренкелек белән эшләү буенча яңадан әзерлек уздык. Махсус киемнәрдә куркынычсызлык техникасы кагыйдәләрен үтәп эшлибез.
Бу авылда мин яхшы эш кенә табып калмадым, булачак тормыш иптәшем Ксенияга өйләндем. Хәзер без ике бала тәрбиялибез – улыбыз Кирилл беренче сыйныфта укый, кызыбыз Янага 1,5 яшь.

Соңгы елларда "Питрәч электр челтәрләрендә" халыкка хезмәт күрсәтү өчен күп эш башкарылды. Безнең электромонтерлар Россиядә беренчеләрдән булып, утны сүндермичә, киеренкелек белән ремонт эшләрен башкара башладылар. Яңа технология буенча питрәчлеләр икенче ел эшли инде. Алар укулар уздылар, базаны яңарттылар, махсус техника һәм кием-салым сатып алдылар. 10000 ирекле көчәнеш белән эшлиләр. Шуңа күрә техника куркынычсызлыгы буенча барлык чаралар да катгый үтәлә. Иң тәҗрибәлеләр һәм укыганнар  җәлеп ителә.
Предприятие базасында даими рәвештә республика семинарлары, һөнәри осталык конкурслары үткәрелә. Күптән түгел генә тәҗрибә уртаклашу өчен Якутиядән коллегалары килде. Изоляторларны алыштыру һәм ток киеренкелеге астында эшләү буенча күрсәтмә семинар Маевка торак пункты янында узды.