Алга
  • Рус Тат
  • Ярты гасырдан соң “Мендельсон маршы”

    Районның гражданнар актларын теркәү бүлегендә бик үзенчәлекле вакыйга булды. Монда 50 ел бергә гомер итүче бәхетле ике парның алтын туйлары теркәлде.

    "Мендельсон маршы", чәчәкләр, бәхетле парлар... Барысы да нәкъ туйдагыча. Тик, чал кергән ак чәчләр һәм фата урынына ак яулык кына парларның 50 ел бергә гомер итүләренә ишарәли. Узган атнада районның ЗАГС бүлегендә шундый ике бәхетле парның алтын туйлары теркәлде. Болар: Шәле авылында яшәүче Мәүлия Миннегали кызы белән Галимҗан Галиҗан улы Әхмәтҗановлар һәм Сания Халик кызы белән Рифат Гатаулла улы Әхмәтҗановлар.
    Аларның балачаклары дәһшәтле сугыш елларына, ә яшьлекләре сугыштан соңгы илне җимереклекләрдән торгызу чорына туры килә. Шуңа күрә бу истәлекле никах көннәрен дә зурлап үкәрмәгәннәр. Һәм менә ярты гасыр узгач, районның гражданнар актларын теркәү бүлеге аларга бу бәйрәмне бүләк итте. Монда әле алтын туйларны теркәү беренче тапкыр оештырыла.
    - Кызганыч, бүгенге көндә яшьләр арасында аерылышулар бик күп. Шуңа күрә, без әлеге күркәм парларны аларга үрнәк итеп куясыбыз килде, - ди бүлек башлыгы Эльмира Нәбиуллина.
    Алтын парларның үзләренә дә бераз тукталып китик әле...
    Мәүлия Миннегали кызы һәм Галимҗан Галиҗан улы Әхмәтҗановларны ферма кавыштыра, дисәң дә ялгыш булмас. Алар икесе дә яшьтән үк шунда эшли. Үткен егет Галимҗанга чая кыз Мәүлиянең мәхәббәтен яулап алуы авыр булмый. 1963 елда алар кавышып, гаилә корып җибәрә. Бер-бер артлы уллары Айдар һәм кызлары Равия дөньяга килә. Бүгенге көндә инде оныклары һәм оныкчыкларына сөенеп яшиләр.
    Шундый ук бәхетле парлар - Сания Халик кызы һәм Рифат Гатаулла улы Әхмәтҗановлар да бүгенге тормышларыннан канәгать яши.
    - Башта авыр булды инде, 5 баланы аякка бастырдык. Ә хәзер, Алланың биргәненә шөкер, бәхетле картлык кичерәбез, - ди Сания апа.
    Бер-берсен аңлап, бергә эшләп, бер-берен хөрмәт итеп яшәү үзенекен итә - никахлары 50 ел элек теркәлсә дә, аларның гаилә коруларына инде 56 ел булган икән.
    Менә шулай авыр сикәлтәле тормыш юллары узып та алар сынмаган-сыгылмаган һәм, иң мөһиме, яшь күңелле булып калган. Йөзләрен бүгенге көндә дә мөлаем елмаю, ә күзләрен илаһи сабырлык нуры бизи. Тагын озак еллар кулны-кулга тотынышып яшәп, кабаттан әлеге маршны ишетергә язсын иде аларга...

    Нравится
    Поделиться:
    Реклама
    Комментарии (0)
    Осталось символов: