“Йөз яшь тулганын сизми дә калдым...”

Хәлимә Гыйбашева - моннан йөз ел элек хезмәт сөючән кешеләре белән дан тоткан данлыклы Шәле җирлегендә дөньяга килгән. Бер гасыр эчендә шатлыгын да, кайгысын да бик күп кичерергә туры килгән аңа.

Яшьлегендә мәктәпне тәмамлап, алга таба укуын дәвам итәргә хыяллана ул. Ә унҗиде яше тулган көнне аны авылдашы Фәйзерахман урлап алып китә. Шулай итеп, яшь кыз өчен ыгы-зыгылы гаилә тормышы башлана. Алга таба уку турында хыялларын да онытырга туры килә. Тиздән яшь парның уллары туа. Тик ул баланы Хәлимәгә ялгызы гына үстерергә туры килә. Фәйзерахман йөзләгән якташлары кебек үк Ватаныбызны явыз дошманнан саклап сугыш кырында ятып кала. Ә Хәлимә гомере буе иренә тугры булып кала, башка ир-атлар ягына борылып та карамый, бүген дә йөрәгендә хәләленә булган мәхәббәт утын сүндерми саклый.

Хәлимә Гыйбашева - бөтен гомере буе фермада эшли. Вахитов исемендәге колхозның беренче сыер савучысы була ул. Җитәкчеләре аны эш сөючән, тырыш булганы өчен хөрмәт итә. Гомере буе алдынгылар сафыннан төшми Хәлимә. Үз вакытында колхозның иң яхшы сыер савучыларын да аның исемендәге кубок белән бүләклиләр. Үзенә бирелгән бүләкләрнең дә исәбе юк. Медаль, грамота, рәхмәт хатларын санап бетерерлек түгел.

Алтмышынчы елларда танылган рәссам тырыш Шәле терлекчеләре турында картиналар яза. Алар арасында Хәлимә Гыйбашева да була.

- Ул һәркем өчен үрнәк булды, - ди үзе дә гомере буе фермада бозау караучы булып эшләгән туганы Әлфия Әхмәтшина, - ул өйдә дә, фермада да гел беренче булды. Без бар эшне дә аның кебек эшләргә тырыштык. Барыбыз өчен дә игътибарлы, ихтирамлы, кайгыртучан туган булды ул.

Бүген йөз яшьлеген билгеләп үткән көндә үз тормышын яңабаштан хәтереннән кичерә Хәлимә апа. Аның хәтере яхшы әле, бары тик күзләре күрми һәм аяклары начар йөри. Тик аның моңаеп утырырга вакыты юк, янәшәсендә оныклары, оныкчыклары, хәтта оныкчыкларының балалары аңа күңелсезләнергә ирек бирми. Туган көнендә дә аның йорты балалар тавышы, тәмле ризык исенә тулып тора иде.

-Бүгенге көндә бер кайгым да юк, тормышым түгәрәк, моның өчен балаларыма меңнән-мең рәхмәт әйтәм, - ди Хәлимә әби.

Хәлимә Галиулла кызын тәбрик итәргә бу көнне район башлыгы Эдуард Дияров та килде. Ул юбилярны Россия Федерациясе Президенты Владимир Путин һәм Татарстан Республикасы Президенты Рөстәм Миңнеханов исеменнән дә котлап бүләкләр, чәчәкләр бүләк итте. Ә иң мөһиме - Хәлимә апага сәламәтлек теләде. Юбилярны шулай ук район социаль яклау идарәсе башлыгы Эльгиза Фәйзуллина, Шәле авыл җирлеге башлыгы Илшат Әхмәтҗанов та котлады.