«Ак Барс Питрәч» язгы кыр эшләренә 100 процент әзер

Агрофирманың технопаркы теләсә нинди мәсьәләне хәл итү өчен җиһазландырылган. Аның составында 54 трактор, шул исәптән 14 куәтле трактор бар. Алар арасында 400 ат көчендәге двигательле 7 куәтле “Нью Холланд” бар, аларга сөрү һәм чәчүнең төп йөкләнеше төшәчәк. 160 көчле “Зумлионнар” тырмалау белән шөгыльләнәчәк. Автомобильләрнең гомуми саны – 40, шуларның 13е – йөк КамАЗлары. Аларның бурычы – чәчү комплексларына ашламалар һәм орлыклар ташу. Бу техника 4000 баш эре мөгезле терлеккә һәм 4500 гектар чәчүлек мәйданнарына хезмәт күрсәтә ала.

– Зур хуҗалыкта проблемаларсыз булмый бит, – ди предприятиенең баш инженеры Александр Куранов. – Санкцияләр һәм импортны алмаштыру шартларында без инде берничә ел чит ил тракторларына Россия майларын салабыз. Чит илдән запас частьләр алу да бик авыр, алар 2-3 ай килә, гаризаларны 1 ноябрьгә кадәр җибәрәбез. Шуңа күрә кайдадыр үзебезнең запас частьләр, ә нәрсәнедер, гомумән, үзебез эшлибез.

Тәҗрибәле электр-газ белән эретеп ябыштыручы Раил Гибатов гади металл плитәдән инде әллә ничә чит ил тракторына тагылма җайланмасы ясаган. Аның сүзләренә караганда, детальләр заводныкыннан яхшырак килеп чыга, тракторны тулысынча эшкә яраксыз, дип тапканчыга кадәр файдаланачаклар.

Александр Куранов 2002 елдан предприятиенең инженерлык хезмәтен җитәкли. Белгеч яшь кадрлар белән проблемаларны билгеләп үтте:

– Авыл хуҗалыгында кадрлар мәсьәләсе кискенләшә. Без әлегә кадрлар белән тәэмин ителгән, әмма буыннар алмашынуы турында кайгыртабыз. Ремонтчыларның уртача яше 45-55 яшь. 71 яшьлек токарь предприятиедә эшләвен дәвам итә. Ә яшьләр безгә килмиләр, гәрчә хезмәт хаклары яхшы булса да. Тракторчыларга кытлык сизелә – яшьләр шәһәргә китүне яхшырак күрә, анда җиңелрәк. Безнең өчен кадрлар әзерләгән лицей, хәзер авария хәлендә булу сәбәпле, ябык. Әмма без аграр югары уку йортыннан студентларны практикага алабыз, – дип аңлата баш инженер. – Бүген безгә узган ел практикада булган егет эшкә урнашырга килде. Тракторчы булачак.

Машина йөртүче Рөстәм Нигъмәтҗановка тиздән 61 яшь тула, хезмәт стажы – 42 ел. Ул да яшьләр белән проблемалар булуы турында әйтә:

– Яшьләр җиңелрәк эш эзли. Ә бит бездә барлык шартлар да тудырылган – ашаталар, махсус киемнәр дә бирәләр. Әмма без әлегә барысын да үз көчебез белән хәл итәбез. Машина яңа, кәеф яхшы, эшкә әзербез. Чәчү агрегатларына ашлык, ашламалар ташыячакбыз.

Быел хуҗалык 10 заманча тырмалау җайланмасы сатып алган, бу эшне шактый җиңеләйтәчәк. Элек механик тоташтыргычларда 5-6 кеше һәм ике трактор кирәк булган урыннарда хәзер бер трактор һәм бер оператор җитә.

– Бездә тимерче, слесарь бар. Кыш буена без 500 тырманы тулысынча әзерләдек һәм элеп куйдык, – дип сөйли Александр Николаевич. – Тырмаларны сатып алырга туры килмәгәнлектән, җиһазларга экономия һәр эләктергечкә 500 мең сум чамасы тәшкил итте. Хезмәт шартлары яхшырды һәм йөк ташу күпкә җиңеләйде. Технологияне яхшырак үтәү туфрак эшкәртүнең югары сыйфатын тәэмин итәчәк.

Фәнис Шәйдуллин 92 нче елдан бирле машина йөртүче булып эшли. Яз көне яңа КамАЗ биргәннәр һәм хәзер йөк күбрәк сыйсын өчен бортларын такталар белән биегәйтә:

– Ашлама ташыганда – алар авыр, кузов биеклеге җитәрлек. Ә ашлык җиңел, көнбагыш тагын да җиңелрәк – күбрәк тутыру өчен бортларны биегрәк итәбез. Бу йөк сыешлыгын якынча 4 тоннага арттыра. Гомумән, КамАЗлар элек механик иде, хәзер күбесенчә электрон. Менә ягулык насосы да электрон. Дөрес, безнең эш өчен яңадан эшләргә туры килде.

Мастер-көйләүче Павел Богов та язгы кыр эшләренә әзер, аның бурычы – кыр шартларында техникага ремонт ясау:

– Бу максатлар өчен бездә ике машина – минем “Газель” һәм “Уазик” җиһазландырылган. Аларда 10 киловаттка исәпләнгән зур дизель электрогенераторы, өрдерү өчен куәтле компрессор, аккумуляторлар өчен зарядка, эретеп ябыштыру, механик эшкәртү җайланмалары монтажланган.

– Апрель башында ук җылы һава торышы урнашты. Без уҗымнарны тукландыруга керештек инде, – дип билгеләп үтә “Ак Барс Питрәч”нең баш агрономы Николай Кузнецов. – Техника стартка, ә кешеләр эшкә керешергә әзер. Орлыклар һәм ашламалар буенча тәэмин ителеш – 100 процент. Орлыклар кондициягә җиткерелде һәм “Россельхозцентр”да тикшерелде. Безнең бурыч – туфракта дым булганда барлык эшләрне, чәчү эшләрен мөмкин кадәр кыска вакыт эчендә тәмамлау һәм үсемлекләрне дөрес тәрбияләүне оештыру.