«Ак барс-Питрәч» хуҗалыгында уңышның яртысын җыйганнар

Акбарслыларда бөртекле культуралар 10020 гектар мәйданны били, шуның 6 мең гектарында - сабан культуралары, 4154тә - арпа, 962дә - сабан бодае, 1374тә - борчак чәчелгән.

Безнең басуларда 14 комбайн эшли, шуларның 12се - «Нью-Холланд СХ 6090» һәм 2 яңа «Акрос-595» маркалы. Ашлык ташуга тагылмалы 4 КамАЗ җәлеп ителгән. Ындыр табагында да барысы да тиешле дәрәҗәдә оештырылган, эшче куллар һәм белгечләр җитәрлек, - дип сөйли баш агроном Николай Кузнецов.

3 августка аграрийлар барлык мәйданнарның яртысыннан диярлек, 45 процентка уңыш җыеп алганнар. Көзге культураларны җыю тулысынча төгәлләнгән. Көзге арыш уңышы гектардан 24 центнер, көзге бодай 23 центнер тәшкил итә.

Бу узган елдагыга караганда күпкә азрак. Әмма корылык көчле булган 2010 елга караганда күпкә яхшырак, - дип бәя бирә баш агроном.

Быел алдынгылар рәтендә «Акрос – 595» комбайннарында эшләгән Радик Нигъмәтуллин һәм Юрий Астраханцев бара. Ярдәмчеләре - уллары Булат һәм Александр. Илфат Әхмәтов бригадасы да калышмый, анда комбайнчылар булып Ринат Шәрәфетдинов, Илнур Фәсхетдинов һәм Рузил Гайнуллин эшли.
Кыр-ындыр табагы маршруты буенча ашлык ташуда лидерлыкны әлегә Алик Мортазин тота. Аның исәбендә 3123 тонна ташылган уңыш. Рәмзил Фәйзрахманов 2748 тонна, Рөстәм Нигъмәтҗанов 2440 тонна ташыган.
4000 гектар мәйданда көзге культуралар чәчүгә киләсе атна башында, 10 августта керешәчәкләр. Шуңа күрә урып-җыюдан соң ук саламны пресслыйлар, җирне сөрәләр һәм туфрак әзерлиләр. Терлекчеләр заявкасы буенча быел 5 мең тонна салам әзерләргә кирәк булачак. Бүген аграрийлар борчак суктыруга керештеләр, ул 1025 гектар мәйданны били.
Радик Нигъмәтуллин комбайн штурвалы артында 21 нче сезон. Хезмәт юлын комбайнчы буларак башлаган.

Минем остазым - тәҗрибәле механизатор Ирек Насыйров иде. Ул миңа үз тәҗрибәсен тапшырды да. Хәзер, үз чиратымда, мин инде икенче сезон ярдәмчем булып эшләүче улым Булатны өйрәтәм. Элек әтием Фәннур Җиһангирович белән эшләдем. Шуңа күрә безнең буында берничә игенче бар. Быел бөртеклеләрнең уңышы аз, шуңа күрә безнең алда аны югалтуларсыз һәм вакытында җыеп алу бурычы тора, - дип сөйли тәҗрибәле комбайнчы.

Сезоннан тыш вакытта ул кошчылык фабрикасында корпусларның берсендә слесарь булып эшли. Аның улы Булат - Арча агросәнәгать көллиятенең икенче курс студенты, булачак механик һәм авыл хуҗалыгы хезмәткәре.
Аларның хезмәттәше Юрий Астраханцев авыл хуҗалыгы кырларында 22 ел хезмәт куя.

Улым Александр белән бергә эшлибез. Ул инде 17 ел минем ярдәмчем булып тора. Шуңа бер-беребезне алыштырабыз. Мин аңа ышанам, чөнки ул тәҗрибәле комбайнчы. Быел без яңа комбайннарда эшлибез. Әлбәттә, яңа техникада эшләү күңелле, кабинада барлык уңайлыклар да бар, - дип сүзен йомгаклады Юрий Астраханцев һәм үзенең төп вазыйфасы - сәнәгать куркынычсызлыгы буенча инженер булуын ассызыклады.