Александра Лепкова: «Менә инде 26 ел аяк киемнәре ремонтлыйм»

– Абый миңа үзендә эшләргә тәкъдим итте. Ул ачкычлар ясады, һәм мин шул ук киоскта аяк киеме ремонтлый башладым. Башта аны хобби буларак кабул иттем, әкренләп ул минем һөнәремә әверелде. Менә инде 26 ел аяк киемнәре ремонтлыйм, – диде елмаеп аяк киеме ремонтлаучы.

Ул барысын да эшли белә. Аяк киеменең замогын да, набойкаларын да алыштыра, үкчәләрен беркетә, табан асларын тегә һәм ябыштыра, таймасын өчен профилактика ясый, хәтта туфлиләрнең очларын кыскарта. Аяк киеменнән тыш, аңа яңа ачкычлар ясатырга, сумкалар һәм чемоданнарны ремонтлау өчен мөрәҗәгать итәләр.

2014 елда Александра “Татарстанның бриллиант кәләше” конкурсында катнаша һәм махсус титул яулый, бу аның тормышын 180 градуска үзгәртә.

 – Конкурсның аяк киеме рәтләү эшенә бер кагылышы юк иде. Мин бары тик төрле кешеләр белән аралашырга теләдем. Әзерлек вакытында башка конкурсантларның аяк киемнәрен ремонтладым. Шулай итеп күп кеше белән дуслаштым. Шундый тәҗрибәм була торып, минем һаман да ялланып эшләвемә гаҗәпләнделәр. Ул чакта керемнең 60 процентын кибет хуҗасына бирә идем. Минем үз эшемне ачып эшләү турында уйлаганым да булмады, курка идем. Бу бит зур җаваплылык. Салымнар турында белергә, декларация тапшырырга кирәк, шулай да конкурста катнашучы кызлар мине аяк киеме бизнесын ачарга күндерде. Акча җыйдылар, киоск сатып алырга һәм шәхси предприятие рәсмиләштерергә ярдәм иттеләр. Бу минем өчен уникаль тәҗрибә булды, – дип сөйләде Александра.

Александра гомере буе Чаллыда яши, 2017 елда Питрәчкә күчеп килә. Монда үзмәшгуль буларак теркәлә.

– Башта минем каенанам монда күченде. Татарстан районнарыннан Питрәч безгә аеруча ошады. Без яшәргә монда калырга булдык. Хәзер Чаллыга чакыралар, әмма мин монда төпләнеп калырга телим. Үз эшең була торып, яшәү урынын үзгәртү җиңел түгел, чөнки барысын да баштан башларга кирәк, – ди ул.

Питрәчтә остаханәне үз өендә булдырган. Кечкенә бүлмәдә барлык кирәкле эш кораллары бар.

– Авылда аяк киеме рәтләүчеләр бар, шуңа күрә миңа ишетеп киләләр. Нигездә, машина белән Царевога, Иске һәм Яңа Шигали авылларына барам. Аяк киемен үзем алып кайтам, үзем илтеп бирәм. Бер көндә сигез-тугыз адрес буенча чыгам, – дип уртаклашты ул.

Аяк киеме остасы табигый күн аяк киеме сатып алырга киңәш итә, алар озагракка чыдый.

– Кайчагында яңасын ремонтлауга караганда сатып алу җиңелрәк. Ләкин кайбер кешеләр аяк киемен ремонтлауга өстенлек бирә. «Аяк киеменә күнеккән, бик уңайлы», диләр. Мондый очракларда мин баш тартмыйм. Минем арзан һәм кыйммәтле аяк киеме өчен бәяләр бер үк. Бер хатын-кыз 40 мең сумлык Италия сапогие алып килгән. Таймасын өчен аслык ясарга кушты. 350 сумга эшләдем. Ә шәһәрдә моның өчен 2500 сум сораганнар. Кайбер аяк киеме ремонтлаучылар хезмәт өчен аяк киеме бәясеннән дә күбрәк акча сорый, – дип сөйли Александра.

Санкцияләр аның эшен читләтеп узган. Ләкин махсус хәрби операция белән бәйле рәвештә базарда киез итекләр өчен киезләр калмаган. Александра Лепкованың планнары алга таба үз эшен үстерү.

– Аяк киемен тегү технологиясе бер урында тормый. Шуңа күрә остага даими рәвештә белем алырга кирәк. Мин үз-үземне үстерү өчен хәтта аяк киеме заводында эшләдем. Бу тәҗрибә миңа эштә бик файдалы булды. Гаиләмә, бигрәк тә иремә рәхмәтлемен, алар миңа һәр яклап булыштылар. Алардан башка мин өч бала белән мондый бизнесны күтәрә алмас идем, – дип исәпли Александра.

Бу кыю хатын әле таксида да эшли, ләкин бу бөтенләй башка тарих…

Аяк киеме кибете яхшы керем китерә. Үзмәшгульләр аена 50 мең сумнан артык акча эшли.