Авыл яшьләре сөт бизнесын үзләштерә

Питрәчнең 12 крестьян-фермер хуҗалыгы сөт җитештерә, аларда 731 сыер асрала. 8 ай эчендә алардан 2500 тоннадан артык сөт алганнар. 

Безнең крестьян (фермер) хуҗалыкларында бер сыердан тәүлеклек савым 11 килограмм тәшкил итә. Алдынгылыкта Х.С.Абдуллин КФХ - 14,5, Н.Р.Хәйруллин КФХ – 14,1 һәм З.З.Фәсхетдинов КФХ – 12,6.

Наил Хәйруллин 2017 елда Казан аграр университетының инженерлык факультетын тәмамлаган. Туган авылы Күнгә кайтканнан соң терлекчелек белән шөгыльләнергә карар кыла. Аны бу башлангычта әти-әнисе һәм хатыны Рамилә дә хуплый.

Авыл кешесе буларак, мин кечкенәдән терлекче булырга хыялландым, яшьтәшләрем машина йөртүче, механизатор булырга тели иде, - дип сөйли Наил. - 2019 елда безнең хуҗалыкта берничә башка исәпләнгән яңа сыер абзары төзелде. Ул чакта мин сөт җитештерү белән ныклап шөгыльләнергә булдым. Үземнең чит ил машинасын сатып, «Макс-Ойл» ҖЧҖ хуҗалыгыннан кара-чуар токымлы алты тана сатып алдым. Язын алар барысы да бозаулады: сөт сава башладык, баш саны артты. Шулай итеп мин акрынлап аякка бастым.

Терлекчелек белән шөгыльләнү үзен ул вакытта ук аклаган. Соңрак, авылдан ерак түгел 25 гектар җир рәсмиләштергән, тагын бер мини-ферма төзегән. Анда Айшир токымлы сөтле сыерлар асрый башлый. Бу сыерлар фермерны салкыннарга чыдам булулары һәм чирләмәүләре белән җәлеп иткән. Наил билгеләп үткәнчә, сөтнең майлылыгы бик югары. Яхшы тәрбияләгәндә 25әр килограмм сөт бирәләр.

Мин аларны Ленинград өлкәсеннән алып кайттым. Башта барып карадым. Аларның чынлыкта нинди булуларына инанып, сатып алырга булдым. Өйдә сыерлар көтүдә йөрсә, бу фермада бер типлы ашату, печән, фураж ашатабыз һәм бернинди био яки башка өстәмәләр бирмибез. Без чиста авыл сөте алабыз.
Җирне эшкәрттем генә әле. Киләсе елга арпа һәм люцерна чәчәргә планлаштырам. Арсеналда бер МТЗ-82 тракторы, азык әзерләү өчен - КИР-1,5, тегермән, өч савым аппараты бар. Азык, нигездә, сатып алынган, печән һәм салам җитәрлек әзерләдек. Быел ашлык белән генә кыенрак.

Хатыны Рамилә ярдәм итә, ул аның уң кулы. Хәйруллиннарның эш иртәсе инде сәгать 4тә башлана. Сигезенче яртыга сыерларны ашатып, савып, бозауларны карап, асларын җыештырып, бар эшне төгәллиләр. Аннан өй мәшәкатьләре белән шөгыльләнәләр, уллары Саматны балалар бакчасына илтәләр.
Наил эше тыгыз булуга да карамастан, волейбол уйнарга да вакыт таба. Үзе әйтүенчә, ул спорт белән күптәннән мавыга икән. Сүз уңаеннан, быел ул уйнаган «Виктория» командасы район чемпионы булып калды.

Мин үз эшемне таптым, һәм аннан ләззәт алам. Бу эш миңа да, гаиләмә дә ошый, ул безгә мул уңыш китерә, - ди Наил.

8 сентябрьгә район буенча тулаем савым 69,1 тонна тәшкил итте, бу узган елга караганда, 6,6 тоннага күбрәк. Бер сыердан уртача савым - 18,6 килограмм. Бу 2020 елның шул ук чоры белән чагыштырганда 1,6 килограммга күбрәк.