«Безнең ишегалды» программасыннан соң Питрәч районы урамнары нинди

Фото: © Люция Сираҗиева / «Питрәч-информ»

Районда йорт яны территорияләрен төзекләндерү буенча республика программасын гамәлгә ашыруның биш елында төзекләндерелгән 15 адресны тикшерделәр. Эшләр исемлегенә юлларга асфальт җәю, тротуарларны, балалар һәм спорт мәйданчыкларын, парковка зоналарын төзекләндерү, урамнарны яктырту, шулай ук эскәмияләр, урналар һәм кер киптерү урыннары урнаштыру керә. Һәр ишегалдының үз индивидуаль проекты, шуңа күрә бу исемлек аерылып торырга мөмкин. Кайбер объектларда район хисабына су белән тәэмин итү һәм пычрак суларны агызу системалары үзгәртелгән.

Комиссия Кощак, Иске Шигали, Ленино-Кокушкино һәм Питрәч авылларында булды. “ТР шәһәрләрен үстерү институты” фонды архитекторы Динә Рамаева билгеләп үткәнчә, тикшерү вакытында балалар зонасы һәм юлларның ничек кулланылуына аерым игътибар бирелде.

– Беренче чиратта, без балалар мәйданчыкларын карыйбыз, уен һәм спорт җиһазларының төзеклеген тикшерәбез. Шулай ук тротуарларның, юлларның һәм асфальт катламының сыйфатын да бәялибез. Әгәр дефектларны ачыкласак, без аларны теркибез һәм аларны бетерү өчен җаваплы оешмаларга вакыт бирәбез. Питрәч районында кискен хокук бозулар ачыкланмады. Әлбәттә, вакыт узу белән нәрсәдер туза яки вандализмнан зыян күрә, әмма мондый проблемалар хәл ителерлек, – дип аңлатты ул.

Тикшерү барышында архитектор берничә кисәтү теркәде. Бу, мәсәлән, бордюр ташының зарарлануы, җәяүлеләр зонасы кырыйларында үлән үсүе. Шулай ук кайбер уен мәйданчыкларында стендларда яшь чикләүләре һәм эксплуатацияләү кагыйдәләре булган мәгълүмати баннерлар юк. Тикшерүдә ТР Дәүләт торак инспекциясе, төзелеш һәм идарәче компанияләр вәкилләре катнашты.

Яңартылган территорияләрнең сакланышы коммуналь хезмәтләрнең эшенә генә түгел, һәркемнең җаваплылыгына бәйле. Кызганыч, җиһазларның беркетмәләрен борып алу яки конструкция элементларын металлалом өчен алган очраклар да бар. Шуңа күрә питрәчлеләрне үзләре өчен тудырылган уңайлы шартларга сак карарга чакыралар.

ФОТОРЕПОРТАЖ