Бүген Халыкара балаларны яклау көне билгеләп үтелә

Питрәч авылыннан балалар сәнгать мәктәбен тәмамлаган Кирилл Спичков һәм Ленино-Кокушкино авылыннан спорт мәктәбендә тәрбияләнүче Анна Блаченова яраткан шөгыльләрендә зур биеклекләргә ирешәләр. Икесе дә моның тормыш эшенә әйләнүен тели.

ТРЕНЕРЫНЫҢ АТАКЛЫ ТӘРБИЯЛӘНҮЧЕСЕНӘ ТИҢЛӘШЕРГӘ ТЕЛИ

Анна Блаченова нәфис гәүдәле кыз булуына карамастан, бик көчле, дөресрәге аның куллары көчле. Ул 2019 елдан башлап атнага өч тапкыр “Мишә” спорт комплексында армрестлинг белән шөгыльләнә. Аның тренеры – Россиянең атказанган тренеры һәм спорт мастеры Сергей Блохин. – Ел буе үткәрелгән тренировкалар ике өлешкә бүленә. Аның беренчесенә масса җыю өчен көч күнегүләре, штангалар һәм гер күтәрү, тренажерлар керә. Калган алты ай өстәл артында үтә. Безнең арада ике кыз гына, калганнары – малайлар. Егетләрне җиңү авыррак, әмма ул яңа гына килгән яки аның авырлыгы азрак булса, мин аның белән көрәштә җиңәм, – дип сөйли Анна. Ул катнашкан иң масштаблы ярыш – Орел шәһәрендә Россия беренчелеге. Кыз, уң кулы көчлерәк булса да, сул кулы белән көрәшеп, өченче урынны һәм гомуми дүртенче урынны алды. Анда аңа “Спорт мастерлыгына кандидат” билгесе тапшырдылар.

– Ни өчен сез ир-атлар спорт төрен сайладыгыз? -– дип сорадым аннан.

– Бу спорт төрен ир-атлар өчен генә димәс идем. Ярышлар белән бөтен Татарстанны, Идел буе федераль округын әйләнеп чыктым, анда һәрвакыт кызлар күп җыела, – дип җавап бирде Анна.

Ул укытучысының элеккеге тәрбияләнүчесе Артур Макаровка тиңләшергә теләвен әйтте. Артур спортта зур уңышларга ирешкән, хәзер дә кайвакыт алар янына килә, алар белән таныша, аралаша.

Анна өйдә дә үзенә ял итәргә ирек бирми, аның кул көрәше өчен махсус өстәле бар. Көндәше ролен әнисенә башкарырга туры килә, ул да кайчандыр армрестлинг белән мавыккан. Кыз унынчы сыйныфны тәмамлаган, әлегә һөнәр сайламаган, әмма аның спорт белән бәйле булачагын төгәл белә.

“УЛ СӘХНӘНЕ ЯРАТА”

Берничә ел элек кечкенә малай бер мультфильмда флейтада уйнаганнарын күргән. Ни өчен икәнен үзе дә белми, әмма бу эпизод аның хәтерендә сакланып калган. Әнисе алты яшендә музыка мәктәбенә алып баргач, аңа үзе уйнарга өйрәнергә теләгән музыка уен коралын сайларга тәкъдим иткәннәр һәм Кириллның күз алдына нәкъ менә флейта килгән. Ул шул уен коралын сайлый һәм ныклап шөгыльләнә башлый.

Вакыт узу белән укытучылар яхшы ишетү сәләте белән бергә малайда вокалга сәләт барлыгын да күрәләр. Аңа микрофон бирәләр һәм шунда ук диярлек “Созвездие-Йолдызлык” фестиваленә җибәрәләр. Ул район этабын уза, зона турында Балык Бистәсендә чыгыш ясый, әмма республика дәрәҗәсенә ирешми. Ул вакытта ул әле кечкенә була, хәтта үзенең төшеп калуын да аңламый кала, ә республика дәрәҗәсенә ирешү өчен бик аз гына калган була инде. Ләкин аны җиңүләр алда көткән. Кирилл Спичков район, республика һәм халыкара дәрәҗәдәге төрле вокаль конкурслар һәм фестивальләрдә 56 тапкыр лауреат һәм дүрт тапкыр дипломант булган, аларның иң әһәмиятлеләре “Балачак”, “Сандугач-Соловей” конкурслары.

Сигез ел дәвамында Кирилл Спичков музыка мәктәбендә төрле остазларда белем ала. Аны вокалчы буларак Ринат Гыйләҗев һәм уен коралларында уйнаучы буларак Лариса Макарова кабул иткән һәм укытып чыгарган. Малай күптән түгел генә укуын тәмамлау турында таныклык алды.

– Улым бөтен буш вакытын дәресләргә багышлады. Аңа бу бары тик рәхәтлек кенә бирә, ул иҗатны, сәхнәне, бигрәк тә җырларга ярата. Өйдә дә бертуктаусыз җырлый. Ул керәшен җырларын башкарырга ярата. Без әле Казан балалар филармониясенә (ансамбль составында) йөрибез. Улым музыка училищесына укырга керергә хыяллана. Без аның белән горурланабыз һәм бу юнәлештә үсешне дәвам итәчәкбез, – дип сөйләде малайның әнисе Галина Николаевна.

Спичковларның өч балалары бар. Олы уллары да музыка белән шөгыльләнгән, әмма нәтиҗәдә машина төзелеше буенча техника белгечлеге алган, кече кызлары бию белән мавыга.