Чытыда авыл көнен билгеләп үттеләр
Соңгы елларда күп төбәкләрдә авыл көннәрен үткәрү традициягә керә башлады. Берсен-берсе сагынган, ераклардан кайткан кешеләрнең очрашулары бик яхшы, әлбәттә. Бер урамда, янәшә яшәүчеләр исә, яшәү дәверендә дуслашып, туганлашып та бетә.
Чыты авылының Чулпан урамында яшәүче буларак, бергәләп сөйләшеп алдык та, шушындый бер кичә оештырырга дигән фикергә килдек. Бу инициативаны Рәмзия һәм Илшат Зиннәтовлар, Альмира Зиннәтова күтәреп алдылар. Башта ниндиерәк формада оештырырга икәнен сөйләштек, планын төзедек, аннан бергәләп табын өстәле әзерләдек, урамдашлар булышырга килде. Зур, озын өстәл артына шушы урамда яшәүче һәркемгә урын табылды: Ленин ордены кавалеры, 90 яшьлек Минзифа апа Зиннәтова да, ветеран укытучы Әлфия апа Мортазина, 90 яшен тутырган Хатирә әби дә, гомере буе колхозда көч куйган Сания, Зөләйха апа да безнең урам кешеләре! Урамыбызның хөрмәтле кешеләренә истәлек-бүләк итеп китаплар, блокнотлар тапшырдым. Олылар белән беррәттән яшьләргә дә урын табылды. Бергәләп тәмле ризыклар белән сыйландык, урамдагы кызыклы кешеләр, вакыйгаларны искә алдык.
Урамыбызда яшәп, бакыйлыкка күчкән әрвахларны да искә алдык, мәчет әһелләре җомга намазыннан кайтышлый, безнең яныбызга тукталып, Ясин, Тәбарәк сүрәләре укып, табыныбызга, рәсми булмаган чарабызга тагын да ямь өстәделәр.
Табыныбызга 4 буын Хәдиуллиннар нәселе вәкилләре килеп кушылуы үзе бер могҗиза! Мөнәвәрә апа, Татар Тау Иле авылында туып, урамыбызга 1951 елны килен булып килә. Кызы Расиха апа, язмышлар кушуы белән, Казахстан якларында яшәп, гаиләсе белән туган авылыбызга әйләнеп кайтты. Шушы көннәрдә алар гаиләсенә кызы Гөлназ оныгы Анита белән кунакка кайткан. Мөнәвәрә апаның туган көне дә иде әле ул көнне! Бәйрәм өстенә бәйрәм булды бу!
Чулпан урамында сүзгә, җыр-биюгә оста кешеләр җыелган икән, ләбаса! Бергәләп жырлашып, биешеп утыра торгач, вакытның узуы да сизелмәгән! Элек кунаклар килгәндә бер самавар чәй эчелде дип сөйләгәннәр. Безнең очрашуда исә, алмаш-тилмәш ике күмер самавары бертуктамый чәй белән сыйлады үзебезне!
Урамдашыбыз Халисә апа пешергән тәмле коймаклардан, кунаклар үзләре белән алып килгән күчтәнәчләрдән озаклап, тәмләп чәй эчә-эчә, киләсе еллларга да исән-сау килеш очрашырга сүз куештык. Мәсәния апаның озын өстәл-урындыклары бу көнне бушамады, кунаклар белән тулып торды.
Бер очрашу - үзе бер гомер, диләр. Урамдашларга очрашуга җыелганнары өчен зур рәхмәт белдерәм.
Следите за самым важным и интересным в Telegram-каналеТатмедиа
