Грантлар үсеш өчен яхшы старт бирә

“ТӘҮЛЕКЛЕК ЧЕБИЛӘР ЧЫГАРУ БЕЛӘН ШӨГЫЛЬЛӘНӘЧӘКБЕЗ”
Яңа “АгроПтица” кооперативы узган елның декабрендә Шихазда авылында төзелгән, анда 15 авыл хуҗалыгы предприятиесе керә – 3 крестьян-фермер һәм 12 шәхси ярдәмче хуҗалык.
Питрәчнең берничә фермеры инде күптәннән заманча инкубатор сатып алырга теләгән, чөнки аларга кошларны районнан читтән шактый кыйммәт бәягә сатып алырга туры килгән, әмма үзең генә сатып алу һәм аны тоту өчен чыгымнар шактый авырга төшә. Шул чакта Илнур Шәйхлисламов эш башлаучы кооперативлар өчен республика грантында катнашу өчен авылдашларына берләшергә тәкъдим итә, грант откан очракта аны кирәкле җайланмалар сатып алуга тотарга мөмкин. Бераз уйлашканнан соң авыл хуҗалыгы эшчәнлеге алып баручылар ризалаша.
Сүз уңаеннан, кооператив төзү эшен башлап йөрүче кошчыларга яхшы таныш. Аның әнисе Зөлфия Шәйхлисламова белеме буенча ветеринария табибы, инде 30 елдан артык бу эш белән шөгыльләнә, аның крестьян-фермер хуҗалыгында (аның төзелүенә инде сигез ел) сезонына бер көннән бер айга кадәрге 2000 баш кош үсә.
- Без документларны әзерләдек, үзебезнең яңа предприятие үсеше буенча бизнес-план төзедек. Мин грант отасыбызга ышанмаган идем, - дип сөйләде безгә кооператив рәисе Илнур Шәйхлисламов. - Конкурста бит 30га якын кооператив катнашты. Шуларның 11енә генә грант каралган. Шулай да безнең барысы да килеп чыкты, һәм хәзер без тәүлеклек чебиләр чыгару белән шөгыльләнәбез. Мин кооператив әгъзаларыннан заявкалар җыячакмын, йомырка сатып алачакмын, аларны инкубациягә салачакмын, аннары чебиләр тапшырачакмын. Җайланма 24000 йомыркага исәпләнгән, шулардан сиксән процентыннан чеби чыгачак. Крестьян фермер хуҗалыгы булган һәр кеше безнең кооперативка керә ала. Мин республиканың авыл хуҗалыгы үсешенә зур ярдәм күрсәтүенә инандым, аларның сайтында төрле грант конкурслары турында мәгълүматны күрдем, минемчә, аларда һичшиксез, һәркемгә кызыклы идеялары, планнары, омтылышлары булганнарга катнашырга кирәк.
Безнең берләшмә дә киң үсеш алыр, ул районда кооперацияне үстерергә, авыл хуҗалыгы җитештерүчеләре эшчәнлегенә ярдәм итәр дип өметләнәм.

“БАЛЫКЧЫЛЫК ЭШЕН ҮСТЕРӘЧӘКБЕЗ”
Күптән түгел безнең районда африка җәеннәре үрчетә башладылар, бу эш белән Илдар Сафиуллин шөгыльләнә. Ул ике ел арендага алган подвалда эксперимент үткәргән, җайланмаларны да үзе ясаган. Үзе эшләгән савытларда ярты тоннадан артык балык үстергән. Район башлыгы Илһам Кашапов аңа үз бизнесын Питрәчтә “Технопарк” сәнәгать мәйданчыгында урнаштырырга тәкъдим итә. Эшмәкәр моның җитештерүне сәнәгать дәрәҗәсендә башлау өчен яхшы мөмкинлек булуын яхшы аңлый һәм ризалаша. Тиздән “Аквапродукт” кооперативы төзелә, хәзерге вакытта анда 16 предприятие керә, аларның күпчелеге – башлангыч предприятиеләр.
- Безнең җәмгыятькә Кукмара, Балык Бистәсе һәм башка районнардан оешмалар керә. Питрәчтән “Рыбное место” ҖЧҖ һәм “Леон” ҖЧҖ, - диде Илдар Сафиуллин. – Рәсми рәвештә кооперация узган елның ноябрь аеннан эшли. Без откан акчаларга яңа җайланмалар сатып алдык. 40 тонна сыешлы суыткыч, дүрт балыкчыл модуль һәм продукцияне суыту өчен билгеләнгән суыткыч генератор урнаштырдык. Алга таба Татарстан районнарында балыкчылыкны киң җәелдерергә, төрле төрдәге балыкларны үрчетергә һәм эшкәртергә, продукцияне сатуны оештырырга һәм азык җитештерергә планлаштырабыз. Әлбәттә, конкурс безгә бик күп яңа мөмкинлекләр бирде, җайланмалар бик кыйммәт бит, аларны сатып алмыйча торып мондый проектны тормышка ашыру мөмкин булмас иде. Мондый ярдәм алга таба үсеш алыр өчен яхшы башлангыч булды.