Яңа ел каникулларында Питрәч районы полициясенә 429 хәбәр килгән

31 декабрьдән 9 гыйнварга кадәр Эчке эшләр бүлегенең кизү тору частена 429 хәбәр килгән. 70 юл-транспорт һәлакәте булган, нәтиҗәдә, бер кеше һәлак булган һәм икесе имгәнгән.

Беренче зыян күрүче белән авария Яңа ел алдыннан, 31 декабрь иртәсендә, Иске ШигалиПитрәч автоюлында була. “Узып китү тыела” билгесе булуга карамастан, машина йөртүче каршы полосага чыга һәм башка автомобиль белән бәрелешә. Авария нәтиҗәсендә ул терсәк сөяге сыну җәрәхәте ала. Тагын бер хәл 3 гыйнварда була: Екатеринбург кешесе, Шәле авылы юнәлешендә барганда, һава шартларын исәпкә алмый һәм куркынычсыз тизлекне сайламый, бу Ульяновск өлкәсеннән килүче кешенең машинасы белән бәрелешүгә китерә. Пассажир – 2012 елгы бала зыян күрә.

М-7 “Волга” федераль трассасында 4 гыйнварда үлем белән тәмамланган фаҗига була: Башкортстаннан килгән 1971 елгы җәяүле машина астында кала. Ир-ат юл-транспорт һәлакәтеннән соң юл өстендә була һәм ашыгыч ярдәм килгәнче үк урында җан бирә.

Бәйрәм чорында ЮХИДИ хезмәткәрләре барлыгы 58 юл йөрү кагыйдәсен бозу очрагын ачыклаган, дүрт очракта йөртүчеләр транспорт белән аек булмаган хәлдә идарә иткән.

Башка хәлләр арасында урлашу очрагы да теркәлгән: Иске Шигали авылында якынча өч мең сумлык ягулык урланган. Районның ике кешесе мошенниклар корбаны булган: берсен товар сату сылтавы белән 16,5 мең сумга алдаганнар, икенчесен социаль челтәрләрдә киштә сатып алганда 35 мең сумга төп башына утыртканнар.

Моннан тыш, Питрәч хастаханәсе полициягә бер җирле кешенең үз-үзенә кул салырга омтылуы турында хәбәр иткән. Шулай ук Яңа Шигалидән мошенникларның кеше исеменә микрозаемнар рәсмиләштерүе турында шикаять килгән.