Яңа ел каникулларында питрәчлеләр “112” номерына 1154 тапкыр шалтыраткан

Яңа ел каникулларында питрәчлеләрдән “112” номерына 1154 шалтырату килгән.

Иң күп мөрәҗәгатьләр район үзәк хастаханәсе линиясенә туры килә, икенче урында – полиция линиясе буенча чакырулар, ә өченче урында – юлларны кардан чистарту белән бәйле хәбәрләр. Бәйрәмнәрнең икенче яртысында, районны бураннардан кар баскач, мондый шалтыратулар аеруча күп теркәлгән.

– Иң күп мөрәҗәгатьләр Питрәч, Кощак, Шәле, Званка авылларыннан һәм “Царево” торак комплексыннан булды, – дип билгеләп үтте Питрәч районы Гражданнарны яклау идарәсе җитәкчесе Илнур Мингалиев. – Бездә федераль, региональ һәм авыл җирлекләре эчендәге юллар өчен җаваплы оешмалар бар. Без гаризаларны турыдан-туры җаваплы хезмәтләргә юллыйбыз, – дип аңлатты ул эш механизмын.

Узган 2025 ел өчен статистика: Бердәм диспетчерлык хезмәтенә барлыгы 22707 хәбәр килгән. Аларның 43 проценты – район үзәк хастаханәсе, 17 проценты – эчке эшләр бүлеге, 10 проценты юл-транспорт һәлакәтләре һәм 9 проценты янгыннар белән бәйле.