«Кайгырту» социаль үзәгендә һәр питрәчле өчен уңайлырак булачак

Без башкарылган эшләрдән соң үзәкнең ничек үзгәрәчәген белдек.

Ремонт турында күптәннән хыялланганнар. Бу цоколь бинасы, анда социаль хезмәт 2006 елда урнашкан. Шуннан бирле ремонт ясалганы булмаган.

Без мөмкинлекләре чикләнгән, өлкәннәр, аз хәрәкәтләнүче кешеләр белән эшлибез. Алар теләсә кайсы белгечкә тоткарлыксыз эләгеп, сыйфатлы ярдәм  алырга тиеш, - дип билгеләп үтә учреждение директоры Эльвира Хәйруллина.

Ремонтка республика тарафыннан 2 миллион сум акча бүлеп бирелгән. Пандус, санузеллар, ишекләр һәм тәрәзәләрне, җылыту, электр үткәргечләрне, тышкы канализацияне алыштыру көтелә. Шулай ук бизәкләү эшләре дә.

Планлаштырылган эшләр 18 процентка үтәлгән. Аларны август аенда тәмамлау планлаштырыла, - дип аныклык кертте район башкарма комитеты җитәкчесе урынбасары  Рамил Шәйхетдинов.

Бераз планировканы үзгәртү көтелә. Аның нәтиҗәсендә тикшерү һәм реабилитация мәктәбе барлыкка киләчәк. Бу махсус бүлмә, җиһазлар һәм техник реабилитация чаралары белән булачак. Яңа кабинетта үзәк хезмәткәрләре питрәчлеләрне урында ятучы һәм аз хәрәкәтләнүче туганнарын дөрес тәрбияләргә өйрәтәчәкләр.

Әйтик, кешедә көтмәгәндә инфаркт яки инсульт була. Еш кына аларның якыннарының югалып калуын күрәбез. Алар авыруны ничек дөрес итеп күтәрергә, әйләндерергә, юарга, ашатырга кирәклеген белми.  Реабилитация мәктәбендә барысы турында да  сөйләячәкләр һәм күрсәтәчәкләр, - дип аңлата Эльвира Илдусовна.

Шул ук кабинетта култык таякларын, инвалид коляскаларын прокатка алу пункты урнашачак. Ул егылып имгәнгән кешеләргә ярдәм итәчәк, һәм бу хәрәкәт чаралары аларга бик урынлы булачак.
Ремонт вакытында үзәк хезмәткәрләре Питрәч авылы, Почта урамы, 15 а адресы буенча күчтеләр.
Алар һәрчак  хезмәт күрсәтергә әзер, ләкин хәзер күбрәк  дистанцион һәм күчмә режимнарда эшлиләр. Хезмәткәрләр үзләренең беркетелгән торак пунктларында урыннарда еш булалар. Социаль хезмәткәрләр патронажында 238 өлкән кеше, 1100дән артык гилә (аларда 1300дән артык бала тәрбияләнә) исәпләнә.