Көектән алтын волонтер Эмилия Курносова: «Бер-беребезгә ярдәм итеп яшик!»

Көектән алтын волонтер Эмилия Курносованың 77 яшендә дә энергия һәм оптимизм ташып тора.

– Лаеш районыннан күп балалы гаилә өчен әйберләр әзерләдек, анда алты бала үсә, аларның икесе – инвалид, – дип сөйләде Эмилия Александровна, “Радуга добра” хәйрия фонды склады буенча экскурсия үткәргәндә. – Биредә бөтен сезонга кием-салым, уенчыклар, аяк киемнәре бар.

Бина – иркен, ул инде әйберләр белән тулы. Элгечләрдә куртка һәм пальто, итәк һәм күлмәкләр эленгән. Аерым шкафларда размерлары буенча чалбарлар тезеп куелган. Кирәкле реабилитация чаралары, балалар караватлары, автокреслолар, ходункалар һәм башкалар бар. Фонд карамагындагылар – инвалид балалы гаиләләр. Республиканың төрле районнарыннан барлыгы 45 гаилә.

Фонд Көек авылының “Светлый” торак комплексында 2021 елның гыйнварыннан эшли башлады.

– Без белдерүләр урнаштырдык, җирле халыктан яхшы әйберләрен ташламауларын, ә безгә алып килүләрен сорадык. Эш шулай башланды. Әйберләрне алып килгәндә, миңа алдан хәбәр итәләр, шуннан соң мин аларны алып калам. Яраксызларын ташлыйбыз, ә яхшыларын таратып элеп куябыз. Монда шулай ук ачык ишекләр көннәре дә уздырыла, ул вакытта өстәмә рәвештә азык-төлек җыелмалары да таратыла. Монда кешеләр пакетлар белән киләләр, үзләренә кирәк әйберне сайлап алалар. Кемдер балалар уенчыклары һәм киемнәр ала, икенчеләре – савыт-саба һәм китаплар. Кемгә нәрсә кирәк…

Тиздән алтын волонтер Эмилия Курносованың хәйрия эшчәнлеге белән шөгыльләнүенә ун ел була. Бу хакта “Вектор добра”, “Безнең заман герое” кебек бик күп Рәхмәт хатлары һәм дипломнары, шул исәптән “Радуга добра” фондыннан Рәхмәт хатлары да сөйли. Ә буш вакытларында зур булмаган уңайлы фатир хуҗабикәсе шигырьләр яза. Балачакта ул аларны яратмавын әйтә.

– Барысы да 2007 елда башланды, мин клиник үлем кичердем, миңа бик катлаулы операция ясадылар, – ди Эмилия Александровна. – Бер айдан соң башта төрле фикерләр уянды, шигырьләр яза башладым, башта тормышчан, аннары лирик.

Бүген аның оптимистик шигырьләре күбрәк.

Аңа инде 77 яшь, ул күпне кичергән, баласын, аннары ирен югалткан, шуңа да карамастан, барысын да җиңә алган, кызы Дашаны ялгызы аякка бастырган, ул бүген инде танылган хатынкыз – һөнәре буенча архитектор. Яраткан оныгы Ростислав әбисен үзенең уңышлары белән сөендерә. Болар барысы да бу позитив, актив хатын-кызга яшәргә, эшләргә көч бирә дә инде.