Көектән сугышчан хәрәкәтләр ветераны: «“9 рота” фильмы безнең полк турында»

Фото: © Люция Сираҗиева / «Питрәч-информ»

Рамил Шакиров Әфганстанга үз теләге белән китә. Ул “9 рота” фильмы төшерелгән полкта хезмәт итә. Десантурада дисциплина һәм үзара ярдәмләшүне танып белә, атаклы Бамиан Буддаларын күрә һәм Пакистаннан ялланганнар белән сугыша.

Рамил Шакиров Бөгелмә төзелеш училищесында эретеп ябыштыручы булырга укыган, 1980 елда Совет Армиясенә алынып, Гайжюнайга һава десант гаскәрләренә өйрәнүләргә җибәрелгән. Укудан соң Бамианда 345 нче аерым парашют-десант полкында хезмәт итә, ә аннары Анавада, Панджшер тарлавыгында.

– Мин башта хуҗалык взводына эләктем, чөнки парашют белән сикергәндә аягымны имгәттем, – дип искә ала Рамил Шакиров. – Ә болай хулиган һәм залетчик булдым. Әфганда әйтүләренчә, иң яхшы сугышчы егетләр – ул залетчиклар һәм хулиганнар. Хуҗалык взводында миңа кочегар булып калу оят иде. Нәкъ шул вакытта Әфганнан офицер килде, аларның анда ничек сугышулары турында сөйләде. Без егетләр кызыксындык, барыбыз да гариза яздык. Кемнең әнисе өйдә ялгыз – аларны алмадылар. Икеләнүчеләргә: “Үзегез баш тартыгыз”, – диделәр. Ә без инде бер ел хезмәт иттек, безгә баш тартырга уңайсыз. Һәм без киттек.

Әфганстан кырыс табигате, хәерче халкы һәм солдат дуслыгы белән истә калды. Полкка бик яхшы, җитди офицерлар сайлана. Дисциплина каты була, солдатларны өйрәтәләр, ә кайчакта аларны яшереп калдыралар. Рамил Шакиров үзенең взвод командиры, өлкән лейтенант Гайнуллин белән горурлана, ул ут эченнән ике яралы егетне алып чыккан.

Рядовой хезмәте гади – кая җибәрсәләр, шунда барасың. Рамил Шакиров башта автоматчы була, аннары РПКС пулеметы ала. Заданиелар төрле була, вертолетларда очалар, БМД – десант хәрби машиналарында чыгалар.

Кешеләргә дә сугыш төрлечә йогынты ясый. Кемдер үзенең хезмәттәшләре өчен терәк була, мәсәлән, тиз арада взвод командиры урынбасары дәрәҗәсенә ирешкән балалар йортында тәрбияләнгән Володя Жиганов кебек. Ә кемдер башка юлны сайлый, Әзербайҗаннан Морат Сөләйманов кебек. Аның офицерлар белән конфликт килеп чыга, аннары Әрмән якташлары белән бәрелешә, үпкәли һәм дошман ягына китә, үзенекеләргә каршы сугыша.

– “9 рота” фильмы – безнең полк турында, – дип сөйли Рамил Шакиров. – Тик мин дүртенче ротада бераз алданрак хезмәт иттем. Ләкин нәкъ менә шушы урыннарда. VI гасырда кыяда уелган 55 һәм 37 метрлы ике гигант сын – Бамиан Буддасы сыннары бездә зур тәэсир калдырды. Аннары аларны талиблар шартлатты. Җирле халык безгә яхшы мөнәсәбәттә булды. Без бит барыбыз да пионерлар, комсомоллар идек, бездә өлкәннәргә, хатын-кызга карата хөрмәт тәрбияләделәр. Кышлакка кергәндә ягымлы, әдәпле булдык. Нигездә, Пакистаннан килгән ялланганнар белән сугыштык, анда америкалылар котыртты. Җирле халык арасыннан аларга кушылучылар булды – алар бит надан, укыйяза белмиләр.

Әфганстаннан кайткач, Рамил Шакиров Бөгелмәдә эретеп ябыштыручы булып эшли. Ә дүрт ел элек Көеккә күчеп килгән. Үзенең полкташлары, башка ветеранәфганчылар белән элемтәдә тора. Бу туганлыкны ул гомер буе саклый.