Көлкәмәр авылыннан Екатерина Блаченова гомере буе сыер савучы булып эшләгән

Екатерина Блаченова гомере буе сыер савучы булып эшләгән. Ул 1947 елның 5 мартында Керәшен Сәрдәсе авылында Мария Игнатьевна һәм Аркадий Архипович гаиләсендә туган. Катя җиде балалы гаиләдә алтынчы бала булып дөньяга килгән. Әтисе почта хезмәткәре булып, әнисе колхозда эшләгән.

Көлкәмәр авылында Екатерина Аркадьевнаның йортын табу кыен булмады. Без аны бакчада туры китердек, хуҗабикә сарымсак утыртырга җыена иде.

Суны җылыттым, чөнки сарымсакка утыртканнан соң җылы су сибәргә кирәк, - дип уртаклашты ул үз тәҗрибәсе белән. Екатерина Аркадьевна безнең белән сөйләшер, тормыш юлын искә алу өчен башлаган эшен калдырып торды. - Мин туган авылымда дүртенче сыйныфка кадәр укыдым, сигез сыйныфны күрше Чыты авылында тәмамладым, – дип сөйләде ул. – Мәктәпне тәмамлаганнан соң фермада сыер савучы булып эшли башладым. Ул чакта миңа, яшь кызга, өлкән коллегаларым ярдәм итте. Минем группада барлыгы 15-16 сыер бар иде, бөтен эшне кул белән башкардык. Әйе, авыр булды, көнгә өч тапкыр сыер саудык, ашаттыкэчерттек, асларын җыештырдык. Җәйге чорда сыерлар лагерьда тора иде, ул авылдан ун чакрым ераклыкта урнашкан, шуңа күрә кайчагында шунда вагоннарда төн кунарга кала идек. Чөнки көнгә өч тапкыр җәяү бару авыр иде. Буш вакытта без җиләк, гөмбә, чикләвек җыйдык, күңел ачтык. Эштән соң кич белән өйгә кайтып, клубка дискотекага да бара идек. Булачак ирем Яков белән дә 1968 нче елда шунда таныштым, ул шофер булып эшли иде. Без ике бала үстердек. Улыбыз Иван әтисе юлыннан китте, Казанда шофер, кызыбыз Анна Питрәчтә фармацевт булып эшли. Кызганыч, 28 ел элек ирем вафат булды, мин ялгызым гына яшим. Хезмәт хакы лаеклы иде, без айга уртача йөз сум, ә җәен мул сөт чорында тагын да күбрәк акча алдык. Минем яшьтәшләремнең күбесе Казанга укырга, эшләргә киттеләр, ә минем туган җиремне ташлап китәсем килмәде, мин монда эшләргә һәм яшәргә күнеккән идем, – ди Екатерина Аркадьевна.

Авыл тормышын сайлавына ул беркайчан да үкенми. Теләге булган очракта, дус кызлары белән теләсә кайсы вакытта Казанга бара ала. Кияүгә чыккач, күрше Көлкәмәр авылына күченә. Башта дуңгыз фермасында эшли, аннан соң сыер савучы булып урнаша. Ул чакта савым сыерлары да аз булмаган, саву аппаратлары барлыкка килгәч, сыер савучыларның хезмәте бераз җиңеләйгән. Екатерина Блаченова 55 яшендә пенсиягә чыккан, шуннан соң үзен өй мәшәкатьләренә багышларга булган. Элек терлекне күп асраганнар: сыер, дуңгыз, сарык, кәҗә, кош-корт. Хәзер тавыклар гына калган, ләкин аның яшелчә бакчасы зур. Аңа һәрвакыт балалары ярдәм итә, ял көннәрендә әниләре янына кайталар. Кая булса да китәргә туры килсә, йортын карап торырга күршеләре бар.