Кощак яктырып китәчәк һәм уңайлырак булачак

Комсомол урамы нәкь менә Кощакка алып керә торган урам дисәң дә була. Анда ясалма яктырту җайланмалары урнаштырылмаган. Үткән референдумда җирле кешеләр үзара салым средстволарын урам утларын модернизацияләүгә һәм төзекләндерүгә юнәлдерергә карар иттеләр. Биредә эшләр корыган агачларны кисүдән башланды.
- Бу агачлар 70 ел элек утыртылган. Алар инде корыган. Көчле җил вакытында агачлар сына иде. Узган елда хәтта агач машина өстенә сынып төшкән очрак та булды. Шуңа күрә без авыл кешеләре белән бергә бу агачларны кисәргә һәм алар урынына яңаларны утыртырга карар иттек, - дип билгеләп үтте Кощак авыл җирлеге башлыгы Зөбәйдә Саттарова.
Киселгән агачлар урынында 180 яшь үсенте барлыкка киләчәк. Шундый ук эш авыл үзәгендә дә башкарыла. Шул ук вакытта купчелек авыл халкы үзгәрешләргә аңлап карый. Биредә яшәүче Нина Мишина сүзләренчә, агачлар куркыныч тудырган һәм аларны инде күптәннән кисәргә кирәк булган.
- Тополь агачларын кисеп дөрес эшләделәр. Алар инде корыган иде. Биредә машина кую өчен парковка булачак, - диде пенсионер.
Ә машина кую өчен парковка биредә табиб амбулаториясе төзелеше төгәлләнгәннән соң барлыкка киләчәк. Бу эшкә агымдагы елның июль аенда керештеләр. Урынны шулай ук халык фикерен исәпкә алып сайлаганнар. Янәшәдә авыл клубы, авыл советы, банк һәм кибетләр. Табиб амбулаториясе бинасында терапевт, педиатр һәм теш табибы бүлмәләре һәм шулай ук лаборатория урын алачак. Аптека, һичшиксез, кирәк, - ди Нина Мишина.
Кощак авыл җирлегендә 3000 кеше яши. Җирлек башлыгы Зөбәйдә Саттарова сүзләре буенча, аптека мәсьәләсе хәл ителәчәк.
Табиб амбулаториясен төзү буенча монтаж эшләрен төзүчеләр 15 сентябрьгә кадәр төгәлләргә планлаштыралар. Бары тик газ һәм электр белән тәэмин итү, шулай ук территорияне төзекләндерү мәсьәләсе генә калачак. Болар район хисабына башкарылачак эшләр.