Кощакта Качману бәйрәмен билгеләп үттеләр

Кощак авылында Качману бәйрәмен билгеләп үттеләр.

“Бөтен суларның да табигый үзлеге яңара, христианнар ел буе саклый торган су изгеләндерелә. Барлык суны да изгеләндерергә мөмкин, һәм ул рухи көчкә ия була”,– дип билгеләп үтте Питрәч чиркәү округы благочинные һәм җирле Троицкий храмы настоятеле иерей Ярослав Петрущенков.

Рухани шулай ук изгеләндерелгән суның үзлеген саклау өчен аны дөрес куллану мөһим, дип билгеләп үтте.

“Суны чиста урында җыярга кирәк, ул пыяла савытта яхшырак саклана, әмма пластик савытта да сакларга мөмкин. Иң мөһиме – аны салкынча, караңгы һәм чиста урында тоту”, –дип аңлатты ул.

Биредә Федоровский-Флотский чишмәсе урнашкан, аны Ярослав атакай изгеләндергән. Су алырга монда җирле халык та, шәһәр халкы да килә.

Чишмә янында коену урыны бар, ләкин, рухани ассызыклаганча, анда коену дин тотучыга мәҗбүри түгел, бу изге традиция.

“Әмма аны чын күңелдән башкарырга кирәк – спорт кызыксынуы яки сине камерага төшерсеннәр өчен түгел. Максат – рухи һәм тән күнегүләре аша җаныңны ныгыту”, –диде ул.

Районда Питрәч благочиниесенең барлык храмнарында су һәм купельләр изгеләндерелде. Изге суны Качману бәйрәменнән соңгы ике көндә дә җыярга мөмкин. Ярослав атакай билгеләп үткәнчә, Качману суыклары быел да булган, хәер, бу дини аспект түгел, ә картлар күзәтүе булып тора.

ФОТОРЕПОРТАЖ