«Ленино-Кокушкино» музей-тыюлыгы өмәләр айлыгын игълан итә

«Ленино-Кокушкино» тарихи-мәдәни музей-тыюлыгы барлык теләүчеләрне язгы өмәләрдә катнашырга чакыра. Акция апрель буе дәвам итәчәк. Катнашучыларга кирәкле инвентарь биреләчәк һәм чәй эчү оештырылачак.

Музейның фәнни хезмәткәре Диләрә Хәбибрахманова аңлатуынча, әлеге массакүләм традиция Ленин бабай вакытында барлыкка килгән. 

– Өмәләр 1919 елның язында Владимир Ленинның тимер юлларның эшен яхшыртырга чакыруына җавап итеп, гражданнар сугышы һәм хәрби интервенция чорында барлыкка килде. Беренче өмәне үткәрү инициаторлары Мәскәү-Казан тимер юлының Мәскәү-Сортировочная депосы коммунистлары булды, - дип билгеләп үтте ул.

Бүген районыбызның мәшһүр музеенда шимбә өмәләре – тарихи территорияне төзекләндерүгә шәхси өлеш кертү, бер-берең белән аралашу һәм саф һавада вакытны файдалы уздыру мөмкинлеге. Акция районда игълан ителгән санитар-экологик икеайлык кысаларында уза.

Катнашу өчен 8 (906) 111-63-08 телефоны буенча алдан хәбәр итәргә кирәк. 
 

Фотосурәтләр «Ленино-Кокушкино» музей-тыюлыгы архивыннан