Механизаторларның ял итәргә аралары юк

- Безнең хуҗалыкта 1329 мөгезле эре терлек бар, шуларның 600е савым сыерлары, - ди Колай авылындагы хуҗалык директорының  азык әзерләү буенча урынбасары Рәмзил Вәлиев, - нигездә, без азык әзерләү буенча планны арттырып үтәдек. Үлән бик яхшы үсте, печән һәм сенаж әзерләгәндә көннәр коры булды.
Безнең азык әзерләүчеләр ул көннәрдә тырышып эшләделәр, шуның нәтиҗәсендә азык-төлек складлары һәм сенаж базлары ныклап тулды.
Сүз уңаеннан, быел сенаж һәм силос чокырларында капиталь ремонт ясадык, ныгыттык. Көзге кыр эшләрен уңышлы тәмамладык, техниканы кышкы саклауга куябыз. Хәзер бөтен көчне силос әзерләүгә бирәбез. Кукуруз бездә дүрт йөз гектар мәйданны били. Бүгенге көндә йөз гектардан артык мәйданда урып-җыю эшләре башкарылды. План 6000 тонна булганда, әлегә 1400 тонна салдык. Уңыш чыгышы, әлбәттә, узган ел белән чагыштырганда түбәнрәк, шуңа да карамастан, планны үтәрбез дип уйлыйбыз.
Коры һава торышы печән әзерләү вакытында ярдәм итте,әмма ул кукуруз үсешен тоткарлады.
Басуда ике «Полесье» азык җыю комбайны эшли, аларның руле артында кукуруз үстерүче Тольк Ражапов һәм безнең алдынгы комбайнчы Мөдәррис Кәримов. Силос ташуда Евгений Домолазов һәм Артем Вәлиев җитәкчелегендәге ике КамАЗ автомобиле һәм МТЗ -1221 тракторы эшли, аның руле артында Равшан Ражапов һәм Айбек Досчанов.
Силос базында тагын бер комбайнчы Евгений Семенов эшли, ул К-701 тракторында массаны тыгызлый. Менә шулай безнең механизаторлар бер көн дә ял итмичә, башка эшкә керешәләр.
- Мин бу хуҗалыкта унберенче ел эшлим инде, - дип сөйли Тольк Ражапов, - монда без туган абыем Равшан белән бергә. Ә техникага мәхәббәт безгә әтиебездән күчте, ул гомере буе тракторчы булып эшләде. Безнең беренче трактор чылбырлы, Т-4 “Алтай” иде.
Мин кукурузны үзем чәчтем, эшкәрттем, көннәр буе басуда булдым. Егерменче сентябрьдән басуга чыктык, уңыш җыеп алырга вакыт җитте, бу эштә миңа хезмәттәшләрем булыша. Без бит уртак эш башкарабыз. Аннары, кукурузны урып-җыеп бетергәннән соң, фермада эшләячәкмен, анда да кыш буена эш җитәрлек. Аннан безне тагын басулар көтә.
Аның абыйсы Равшанның да язмышы шундый. Шулай ук ул да төрле тракторларда һәм эшләрдә эшли.
- Көнгә КамАЗда уннан артык рейс ясыйбыз, чөнки без чират буенча йөклибез. Сенаж салу тәмамлануга, абыем кебек фермага, азык ташырга барачакмын, - ди Равшан.
Басуда техника күп булса, азык складында бер куәтле К-701 тракторы эшли, аның руле артында яшь механизатор Евгений Семенов.
- Ашлык җыю комбайнын кышкы саклауга куйгач, монда силосны тыгызларга килдем, минем өчен бу яңа эш түгел, көне буе эшлим, ә кышын эш азрак булганда ял итәчәкбез, - ди ул.