“Мәктәпкә җыенырга булыш” акциясе дәвам итә
2007 елдан бирле ел саен безнең районда һәм тулаем республика буенча яңа уку елы алдыннан “Мәктәпкә җыенырга булыш” хәйрия акциясе үткәрелә, ул тормышта авыр хәлдә калган гаилә балаларына яңа уку елына әзерләнергә ярдәм итү кысаларында оештырыла.
Бүгенге көндә мәктәпкә баланы әзерләү – җиңел эш түгел, аеруча да мохтаҗ гаиләләргә. Беренче сыйныфка укырга баручылар өчен яңа уку елы шатлыклы вакыйгага әверелсен өчен аларга мәктәп формасы, канцтовар һәм букчалар кирәк.
Шулай ук, акция кысаларында, беренче генә түгел, 2-11 нче сыйныф укучыларына да ярдәм күрсәтү күздә тотыла. Шуңа күрә хәйрия эшчәнлеге мәсьәләләре буенча район советы район халкына, предприятие һәм оешмалар җитәкчеләренә һәм шулай ук бизнес вәкилләренә әлеге акциядә актив катнашырга тәкъдим итте.
Питрәчтәге кайбер оешмалар инде үз өлешен кертте, бу мәгариф, мәдәният, яшьләр эшләре, спорт һәм туризм бүлеге, район үзәк хастаханәсе, социаль ярдәм бүлеге, "Ак Барс" кошчылык комплексы ҖЧҖ коллективлары һәм башкалар.
Исегезгә төшерәбез, акциянең төп максаты - беренче сыйныф укучыларына ярдәм күрсәтү. Һәркемне әлеге игелекле эштә катнашырга чакырабыз. Битараф булып калмагыз!
Следите за самым важным и интересным в Telegram-каналеТатмедиа
