Питрәч бүлеге җитәкчесе “Алдынгылар хәрәкәте” турында сөйләде

“Алдынгылар хәрәкәте” Россия балалар һәм яшьләр хәрәкәте “Большая перемена” конкурсында катнашучы инициативасы белән барлыкка килә. Татарстан аңа 2022 елның февралендә керде.

Яңа, әмма бик өметле яшьләр оешмасы турында Питрәч бүлеге җитәкчесе Евгений Семенов сөйләде.

– Евгений Олегович, “Алдынгылар хәрәкәте” кайчан формалашты?

ештә сентябрьдә генә эшкә урнаштым. Без балалар иҗат йортында эшлибез, анда көн саен диярлек җыелышлар уза. Ярты ел эчендә без район мәктәпләрендә унике башлангыч оешма ачтык.

– Илдә “Яңа пионерия” ни өчен кирәк?

– Пионерия таркалгач, әлегә кадәр бердәм оешма һәм тәрбия системасы юк иде әле. Минемчә, ул булырга тиеш. Безнең максат – 10-15 елдан соң тормышта үзләренең нәрсәгә ирешергә теләгәннәрен белгән балалар тәрбияләү. “Алдынгылар хәрәкәте”ндә унике юнәлеш эшли: мәгариф һәм белем, фән һәм технология, һөнәр һәм үз эш, волонтерлык һәм иреклеләр, дипломатия һәм халыкара мөнәсәбәтләр, спорт, сәламәт яшәү рәвеше, патриотизм һәм тарихи хәтер, медиа һәм коммуникацияләр, экология һәм табигатьне саклау, туризм һәм сәяхәт, мәдәният һәм сәнгать. Аларның һәрберсендә бала үзен күрсәтә ала. Күп кенә балалар, хәтта унынчы сыйныфта да, мәктәптән соң нинди һөнәр сайлаячакларын белмиләр. Бездә һәр юнәлештә җайлы эш бара, мәктәпне тәмамлаганда балалар үзләре кем булырга теләгәннәрен аңлый башлаячак.

– Балалар белән эш ничек алып барыла?

– Безнең иң зур фишка – балаларның эшне үзләре оештыруы. Балалар нинди чаралар оештырырга икәнен үзләре хәл итә. Шуннан соң без нигезләмә төзибез, тиешле структураларга мөрәҗәгать итәбез һәм анда инде проектны хупларгамы, юкмы икәнен хәл итәләр. Балалар кайда һәм нинди конкурсларда катнашырга икәнен үзләре сайлыйлар. Минем эшем аларга юл күрсәтү һәм ярдәм итү генә. Һәр көн бездә төрле җыелышлар, теге яки бу проект турында фикер алышулар үткәрелә. Мин алар турында белмим дә, балалар үзләре барысын да җайга салалар. Кайвакыт алар без таләп иткәннән күбрәк телиләр. Шулай ук безне төрле төбәк һәм Бөтенроссия чараларына чакыралар.

– Нинди чараларда катнашырга өлгердегез инде?

– Күптән түгел балалар белән Ижевскига “Медиалаборатория” Бөтенроссия форумына бардык. Шулай ук алар “Мәктәп чисталык кубогы” республика турнирында катнаштылар. Чараның балалар дирекциясе әгъзаларының берсе безнең район укучысы Әминә Фәезова иде. Ул үзе 12-13 мәктәп командасын җыйды, район хакимияте һәм мәгариф бүлеге транспорт бирде. Балалар вакытка чүп җыярга тиеш иде. Нәтиҗәдә, бер сәгать эчендә бергәләп табигатьне җиде тонна чүп-чардан чистарттылар. Хәтта бер номинациядә без җиңү яуладык – мөһим артефакт таптык.

– Әлеге хәрәкәткә ничек керергә?

– “Алдынгылар хәрәкәте” Россия балалар һәм яшьләр хәрәкәте сайтында теркәлү узарга кирәк. Россиянең дәүләт хезмәтләренә кушылган булырга кирәк. 6 яшьтән алып 14 яшькә кадәрге балалар ата-аналары ярдәмендә теркәлә, ә 14 яшьтән алып 18 яшькә кадәрге балалар үзләре теркәлә. Шулай ук балалар үз мәктәпләрендәге башлангыч бүлекләргә мөрәҗәгать итә алалар.

– Багышлау ничек уза?

– Бу, мөгаен, һәр катнашучы өчен иң зур һәм мөһим чара. Россиядә беренче багышлау нәкъ менә Татарстанда узды. Бу 26 августта Биләр шәһәрендә “Сәләт” форумында булды, анда Питрәчтән сигез бала багышлау узды.

Сентябрьдә без инде районда башкарма комитет җитәкчесе Вадим Никитин катнашында 50 укучыны багышлау уздырдык. Башта аларга һәм тамашачыларга хәрәкәт турында сөйләдек. Шуннан соң балалар ант бирде, анда безнең хәрәкәт кыйммәтләре яңгырады. Мәктәп директорының тәрбия эшләре буенча киңәшчеләре (быел ил мәктәпләрендә яңа вазыйфа барлыкка килде) аларга значоклар тапшырдылар, ә балалар бер-берсе белән беләзекләр белән алмашты – бу безнең оешманың бердәмлеге символы. Киләсе багышлау җитәрлек кеше җыелгач булачак.

– Проектта катнашу балаларга нинди дә булса өстенлек бирәме?

– Кешегә балыкны болай гына да биреп була, шулай ук балыкны тотарга да өйрәтеп була. БДИ белән дә шулай ук. Балага йомгаклау имтиханына өстәмә ике балл бирергә мөмкин, һәм аны үзе ун балл җыярга өйрәтергә мөмкин. Безнең бурыч – балага үз максатына ирешү өчен кирәкле белем бирү.

– Сез “Алдынгылар хәрәкәте”нә ничек эләктегез?

– Мин Яшел Үзән көллиятендә педагог-оештыручы идем. Проект турында безнең шәһәргә аның җитәкчесе Тимур Сөләйманов килгәч белдем. Ул район үзәкләрендә проект җитәкчеләрен җыючы “Кадрлар резервы” конкурсын игълан итте. Ике меңнән артык кеше гариза бирде, шулардан 40 активист кына сайланды, мин аларның берсе идем.

Яшел Үзәндә җитәкче билгеләнгән иде инде, шуңа күрә миңа Питрәч районында эшләргә тәкъдим иттеләр. Мин бу вазифага бик теләп ризалаштым. Шулай ук Яшел Үзәндә “Яшь гвардия” җитәкчесе булдым. Актив рәвештә иҗат белән шөгыльләндем, КВН командалары белән җитәкчелек иттем, “Нәрсә? Кайда? Кайчан?” кебек чаралар оештырдым. Бу юнәлешләрнең барысын да районда үстерергә планлаштырам.