«Питрәч-Информ» кулланучылар хокукларын яклау темасын яктырткан өчен бүләкләнде
Коллектив кулланучыларга мәгълүмат җиткерүдә өлеш керткән өчен билгеләп үтелде
“Питрәч-Информ” редакциясендә Дәүләт алкоголь инспекциясенең Казан территориаль органы башлыгы Марина Егорова катнашында туры эфир булды. Очрашу барышында ул коллективны республика массакүләм мәгълүмат чаралары конкурсында җиңүләре белән котлады һәм “Иҗади якын килү” номинациясендә диплом тапшырды.
Конкурс кулланучылар хокукларын яклау темасын яктыртучы журналистлар арасында уздырыла. “Питрәч-Информ” беренче тапкыр гына бүләкләнми –редакция актив мәгълүмат эше өчен даими рәвештә хөрмәтләнә. Быел жюри материалларны оригиналь тапшыруны, шул исәптән социаль челтәрләр һәм интернет-ресурслар аша да, югары бәяләде.
Марина Егорова ассызыклаганча, мондый эшчәнлек нәтиҗәсендә Питрәч районы халкы үз хокуклары турында актуаль һәм аңлаешлы мәгълүмат ала. Мәкаләләр, видеороликлар һәм эфирлар кешеләргә законнарны аңларга гына түгел, ә үз мәнфәгатьләрен ышанычлы якларга да ярдәм итә.
“Сезнең актив позициягез киләчәктә дә дәвам итәр дип өметләнәбез. Тирә-юньдә файдалы мәгълүмат никадәр күбрәк булса, кешеләр үзләрен шулкадәр грамоталырак һәм якланганрак хис итә”, – дип билгеләде Егорова эфир ахырында.
Следите за самым важным и интересным в Telegram-каналеТатмедиа
Читайте новости Татарстана в национальном мессенджере MАХ: https://max.ru/tatmedia
